السلام عليكم مدونين ومدونات
الحمد الله الذي بنعمته تتم الصالحات خلص رمضان وخلص العيد ورجعنا من جديد لروتين حياتنا اليومي
ومدوناتنا العامرة
اليوم القصة شوي مختلفة
في يوم من اواخر شهر رمضان كنت اقف في طابور احد الشركات
لاتمام معاملة تقدمت مني سيدة شابة في اتم صحة وعافية وطلبت مني "بلباقة" ان تاخذ دوري في الصف الطويل
انتظرت ان تبرر لي سبب طلبها الغريب بالمرض او غيره
لكن كان عذرها الوحيد انها وقفت في الشباك الخطا !!!!
تطلب مني "بلباقة "ان تاخذ دوري
تطلب مني "بلباقة "ان تاخذ حقي !!!
اخذ الحق بلباقة
يمكن الاخت كانت مهذبة لبقة
بس غيرها لن يطلب حتي
راح ياخذ حقك بدون استذان "بالقوة"
والمواقف كثيرة ومتكررة
سياسة "الاخذ بالقوة والغصب"
في اللغة العربية الفصحى يسمي هالنوع من الأشخاص المـتـنّـمر
Bully
سلوك التنمر هذا واضح جدا حولنا ويكاد يكون ثقافة
التنمر علي الناس والقوانين
انا اريد انا اخذ
بغض النظر عن القوانين وحقوق الناس
مع ان القوانين قبل ان تكون ضدنا فهي معنا
تخيل دولة بدون قانون
ببساطة فوضي وانعدام امان
وسلوك التنمر موجود في جميع انحاء العالم
والي يطّلع علي موقع امازون سيلاحظ الكم الكبير من الكتب الي تتكلم عن هالموضوع
وطريقة التعامل مع هالنوع من البشر ووضع حد لسلوكهم
لانه سلوك "خطأ "
ويجب ان يـقـّوم
بس المشكلة عندنا نكافأ هالنوع من السلوك
الي صوته اعلي ياخذ حقه وحق غيره
والي يسلك الطرق السليمة يمكن ياخذ حقة ويمكن ماياخذه "انت وحظك"
فكيف نتوقع ان يكون في نظام واستقرار
وبما ان السلوك المكافأ يكرر
وما ينتهي الا بالردع
احنا نقدر نردع المتنمر
كل الي اتمناه ان تقول لأ وماتسمح لاي شخص ان ياخذ حقك
هذي الطريقة الوحيدة لحل هالمشكلة
كلمات مثل
ميخالف
توه صغير
طيش شباب
انا ما ادعوا لعدم التسامح بس
شاب يقطع الاشارة الحمراء و يقتل عائلة كاملة
هذا مو طيش شباب هذي جريمة
كل شخص فينا يقدر لما يقول
لأ --------حقي ما اتنازل عنه لك يا "متنمر"
تقدر؟
اشوفكم علي خير
:)
