لما سقراط قال "اعرف نفسك بنفسك " علي بساطة الجملة فهي عميقة جدا وصعبه جدا جدا , تعرف نفسك؟ متأكد ؟
الي أي مدي واي عمق ؟في اوضاعنا الطبيعية والمتوقعة نعرف شلون راح نتصرف
وشنو راح تكون ردت فعلنا ,بس في المواقف الصعبه اختبرت ردت فعلك ؟تعرف شلون راح تتصرف ؟
اغلبنا يظن انه فعلا يعرف نفسه بالكامل بس للأسف قليل الي يعرف نفسه بكامل حقيقتها
لان اغلبنا يدخل الحياة ويطلع منها وهو في ظروف وحده ما تتغير ومواقف شبة متوقعه
والقليل الي يمر بظروف استثنائية تسمحله باكتشاف ابعاد مايعرفها بنفسه .
بالنسبة لي النفس البشرية لغز كبير وجوانب مجهولة صعب اعرفها كلها .
المدونة كانت من الأدوات الي ساعدتني اتعرف اكثر علي نفسي وجوانب كانت غايبة
عني وهذا سبب حبي لها وتمسكي فيها صحيح ابتعدت عنها بس ماكان يطاوعني قلبي
اسكرها , تركتها واليوم ارجعلها .
ابتعدت ومريت بظروف استثنائية وظروف غير استثنائية واكتشفت كثير من جوانب
نفسي ,جوانب ماحبيتها وتخلصت منها وجوانب حبيتها وحابه اطورها وجوانب لحين
مجهولة ناوية اكتشفها واطورها للافضل والاحسن بلغة المبرمجين سويت "اب ديت"
لنفسي وروحي .
ناس أدخلت وناس اطلعت من حياتي والحمدلله علي كل حال , استمتعت بالرحلة علي
صعوبة بعض اجزائها ولكن مثل ما يقول المثل ما في حلاوة بدون نار والفحم بالحرارة
يتحول لألماس , واكيد في ناس ساعدتني بوعي منهم او بدون وعي .
المدونه والمدونين من اكثر الأشياء الي ساعدتني "حبايبي والله " ومن احلي الناس الي
في حياتي " واعتز فيهم جميعا الحاضر والغايب منهم الي مازال موجود والي ابتعد
لأسبابه الخاصة .
ما راح أقول صرت انسانه يديدة ولا راح أقول اني اكره "سويت " الي كانت بس
احترمها واحبها بعيوبها ولو ما اهي ماكانت سويت اليديدة .
كل الي اقدر أقوله اني اليوم انسانه "واعية اكثر " , "محبه اكثر " ولازلت متشوقه
لمعرفة نفسي اكثر واكثر .
اشوفكم علي خير .
_________________
*اللوحة للخطاط :حسن مسعودي
https://www.pinterest.com/pin/565412928189378672/
