شفاف

قط مرة تمنيت تكون شفاف

قط مرة حسيت انك شفاف

قط مرة احتجت تكون شفاف

ولما اقول شفاف اقصد فعلا شفاف غير مرئ

تتحرك بحرية بدون مايشوفك احد

بدون ما يحس فيك احد

وبدون مايسمعك احد

ممكن تكون شفاف بارادتك

وممكن تنفرض عليك الشفافية فرض

مكمن تكون بشكل جزئي

وممكن كلي

الانسان البسيط شفاف محد يسمع

له صوت ولا حتي يشوفة

شفاف شفافية تامة

وكل ما تكاثرت نعم الله عليك

تبدي بالظهور اكثر واكثر

الجاه

السلطة

الذكاء

الجمال

الصحة

كلها اسباب للظهور

مره تكون الشفافية نعمة

ومرات نقمة متعبه تتمني تتخلص منها

بس ماتملك الاسباب الي تكلمنا عنها

يمكن تقدر تحصل علي بعضها

المال او الجمال"الصناعي" مثلا

وغيرها صعب تحصله مثل

الصحة والذكاء

شالحل لحظتها؟

لما تنفرض عليك الشفافية

من اقرب الناس لك

لما تنحرم من كل شي من ابسط حقوقك

ببساطة

لانك موموجود في نظرهم

بس الاصعب والمؤلم

لما تتمني تكون مرئ

والثمن يكون قطعة منك

يا تدفع ولا تظل

شفاف للابد

تدفع؟ ولا .....

اشوفكم علي خير

*********************

واحشيني ياجماعة كلكم كلكم ,ومابعدني عنكم الا الكسل $:

قاتلة الله ,والتويتر مزعلني سحبكم الي هناك وتركتم هنا

عودوا الي مدوناتكم تكفون, قبل اتسكع عندكم الحين وين اتسكع ؟

اضحك علشان تطلع الصورة حلوة

السلام عليكم مدونين مدونات شلونكم وشخباركم

وساحة المدونات فاضية الا من القليل

واغلب المدونين اتجهوا للفيس بوك والتويتر

التويتر وترني الصراحة

مالك الحق الا بكلمة ورد غطاها ما يعطيك فرصة تعبر اكثر

واغلب التويتات سلامات

اما الفيس بوك

قاعدة احاول اتاقلم معاه "احاول لا وعود ;)"

الي لفت نظري فيه الصور

صور كثيرة

وكلها جميلة

وتذكرت مقولة تقول

"All photographs are accurate. None of them is the truth."

- Richard Avedon

"كل الصور دقيقة ولكنها ليست الحقيقة"

من اجمل اوقاتي الوقت الي اقضيه اتصفح صور قديمة

البومات الصور الي مايخلي منها بيت

النشاط المشترك في كل الزيارات بين كل البيوت

علي الاقل في الماضي

اختلفت الوسائل الحين بس الفكرة وحدة

عرض صور حياتنا للناس

سواء كان في البوم للاهل والاصدقاء

او في حسابك الخاص في الفيس بوك

او غيره

صور التخرج, النجاح ,الزواج وغيره من الصور

الي تاكد علي سعادتنا وحياتنا الجميلة

بس هل الصور تعكس كل الحقيقة ؟

توضح الحقيقة الكاملة لحياتنا ؟

ما اذكر شفت صورة

ماتم او عزا مثلا في البومات الصور

ولا حياتنا صارت خالية من كل حزن والم؟

هل الحاجه لتقبل الناس لنا تسمح لنا باخفاء الحقيقة الكاملة عنهم؟

لو كنا اصدقاء حقيقيين او احباب حقيقيين هل كانت هالصور راح تنعرض لنا ؟

ولا كنا راح نسمع الحقيقة من افواه اصحابها بدون فوتوشوب

هل كانت هالصور راح تنعرض لنا لو كنا نتقبل

احبابنا بدون شروط الكمال والجمال

الغلطة غلطة منو؟

غلطتهم لانهم غير كاملين ولاغلطتنا لان مانتقبل الا

"الصور المعدلة"

قولولي تقدرون تتحملون هالحقيقة ؟

اشوفكم علي خير

:)