الخميس، 13 أغسطس 2009

من حقي





السلام عليكم شخباركم مدونين ومدونات ولهانة عليكم وايد


بس شسوي مخي سايح من الشمس ومو عارفة اكتب شي
اهي حاله عثماني عطاها اسم كوول بس الصراحة ما اذكرة


ومالي خلق ادور
الي يعرف الاسم يكتبه ياخذ اجر فيني .
قبل جم يوم قاعدة اتناقش مع بعض الزملا عن موضوع


انا اشوفه حق بس الزملا يشوفونه مبالغة
مني.
بعرضه عليكم وقولوا لي ارائكم :
في حياة كل واحد فينا مجموعة من الناس سواء


كانو اهل ,اصدقاء ,ابناء وغيرة
خل نقسمهم في دوائر يعني الدائرة الاولي دائرة


الاهل والاقرباء الي مالك اختيار في وجودهم


في حياتك
والناس في هالدائرة مالك غني عنهم .
الدائرة الثانية دائرة الاصدقاء والمعارف المقربين


وهي لاشخاص اخترتهم ولهم معزة في قلبك
الدائرة الثالثة هي دائرة الزملاء المعارف البعاد وهكذا
ناس موجودين حوالينك يا باختيارك او بدون


اختيارك كزملاء العمل والدراسة وغيرهم.
وطبعا لي الحق في تحريك الناس بين الدائرة الثانية


والثالثة مثلا زميله عمل حسيت بمدي قربها وتعاملها معاي
ممكن احطها في دائرة الاصدقاء المقربين "الدائرة الثانية "
وممكن صديقة تنتمي للدائرة الثانية يصدر منها تصرف


مؤذي احطها في الدائرة الثالثة .
اظن ان من حقي تكون لي هالدوائر واتعامل معاها بالطريقة الي


تناسبني , السؤال او نقطة الاعتراض من الزملاء
ان في بعض الأشخاص "البعد عنهم غنيمة "يعني اشخاص


راح ابعدهم عن نطاق دائرتي بشكل نهائي "كرت احمر "
طرد .
راي يقول خليهم في دائرتج بس بشكل بعيد نسبيا عنج


ولاتكسبين عداوت احد.
بس اشوف ان من الاسلم البعد عنهم ,من حقي حماية


نفسي من اي انسان ما يقدر او يحترم
انسان يحاول ياذيني باي شكل من الاشكال ,ليش اسمحله


يتواجد في دائرتي لمجرد ان ينقال عني "طيبة ".
اشو ف ان في بعض الناس لازم تاخذ موقف جاد وواضح


من استمرار العلاقة معاهم ,وما اخذ هالقرار الا بعد فرص


ومحاولات كثيرة للتعديل او الترقيع يعني "اخر الدواء الكي".
ليش اسمح حق اي احد يعاملني بطريقة ما استحقها لمجرد ان زميل عمل


او صديق و"مايجوز"في راي البعض طرده من الدائرة
شنو هالشي او الشخص الي اغلي من نفسي اخاف عليه .


انانية ,يمكن بس بالقدر الي يحفظ لي كرامتي وسلامتي العقلية والبدنية .
البعض راح يقولي اوكي اذا مدير او زوج او زوجة ,ادري ان صعبه


بس همن عندنا اختيارت لعمل افضل ,زوج/زوجة افضل


ليش اقبل بالاقل وانا اقدر علي الافضل .
من حقي ولا مو من حقي احتفظ بعلاقات سليمة


وصحية تزيدني ,احتفظ بجواهر


وجودها بحياتي يثريها ويزينها .
ومني لكم
من حقي ولا مو من حقي ؟
اشوفكم علي خير
ومقدما كل عام وانتو بألف صحة وعافية


وعسا ربي يبلغنا رمضان ويعينا علي صيامه وقيامة .

هناك 48 تعليقًا:

جنون الكويت يقول...

ياحلات كلامج والله انتي الجواهر اشتقنالج

Sweet Revenge يقول...

منوووره المركز الاول "جنون الكويت"
والله انتوا الجواهر الي تستاهل تكون في الدائرة;)

esTeKaNa يقول...

اشتقنا لك وانتي تنثرين جواهر فكرك حولنا
:)
ما تتكلمين عنه ذكاء اجتماعي
من حقك دائما انتقاء علاقاتك ووضعها بالمكان المناسب من الدوائر حفاظا لنفسك وراحة بالك
:)
بوست عاقل ومتزن
الله يهنيج بهالعقل ويزيدج :)

Sweet Revenge يقول...

الله يحفظج يا استكانه وطبعا استكانه مرصعة بلولو ومرجان ;)
والله هذا لي نبيه يا استكانه راحة البال بس مناشبيني شسوي ,الله يرضي يعني اجابل ناس لاسنع ولا اسلوب
منورتنا استكانتنا الغالية

عثماني يقول...

اسمه Bloglessation

طال عمرج

:)

يبه يحق لج

تبى حياتج و انتي الوحيد اللي لها الحق في السماح بالمحيطين بالدخول اليها

:)

سعيد لعودتك بعد غياب اخيتي

Sweet Revenge يقول...

Bloglessation

اااااااي هذا اهوا كان حايشني جم يوم والحمد لله بندول المستوصف قام بالازم ;)

حضورك يسعدني ,شرفتنا عثماني مننحرمش :)

أُمْ حَــسَـــنْ يقول...

من حقج ;)

The.One يقول...

من حقج أكييييد !
وزين أتخذتي هالقرار
في غيرج اعجزو يتخذوونـه

وأحسن لج تكونين وسط محيط مريح مأمنـه عليه
وماتحسين بالذنب لوجودج بقربهم


ماشاءالله عليج على طريقة الدوائـر :)
تفكير مميز

ولهنا على بوستاتج بدون مجامله
مشكــورة

Barrak يقول...

طالت الغيبه

-mate يقول...

حيالله الغالية سويت ريفنج

يقولك: أحبب حبيبك هوناً ما ، عسى أن يكون بغيضك يوماً ما ، ((وأبغض بغيضك)) هونا ما ، عسى أن يكون حبيبك يوماً ما

من حقك أن تختاري من تشائي, وليس من حق أي أحد التدخل في شؤونك .. ولكن في رأيي الأفضل أن لا تخسري أعادئك أو الذين لا تودين صداقتهم لتضعيهم في نطاق خارج كل الدوائر والتقسيمات التي تقسم صداقاتك وقربك .. لأن ممكن أن يفيدونك أو يساعدونك حتى لو جعلتيهم ولو في دائرة عاشرة .. وبالتوفيق إن شاء الله

fatto يقول...

كل كلامج انا معاج فيه .. بس في جمله مافهمتها منج

(( بس همن عندنا اختيارت لعمل افضل ,زوج/زوجة افضل ))

مافهمت هالجمله شنو تقصدين فيها !!

هل تقصدين ان زوجج تقدرين ان تبعدينه من الدائره ؟؟؟؟


ناطره الرد عشان اكمل النقاش معاج :)



وانه بعد ولهانه عليج :)

Manal يقول...

منورة
:)

والله يساعدكم على الحر ويساعدنا معاكم
:)

وكل انسان يدور راحته والطريقة الي تخليه ينتج في المجتمع
ويعيش ويتعايش مع الناس
:)

:: بـوح الصمـت :: يقول...

من حقج :)

بعض الأشخاص على الرغم من حبنا لهم ومشاعرنا .. لكن بعدهم أفضل ..!!

منورة مكانج :*

Sweet Revenge يقول...

ياهلا ام حسن مشكورة علي الدعم المعنوي
منورتنا والله ام حسن :)

Sweet Revenge يقول...

the one: يا هلا والله فيج ,فعلا ناس وايد تظل في علاقات متعبة لمجرد الاحراج وفشلة وعيب .
مشكورة ذا ون ووجودج فعلا اسعدني
:)

Sweet Revenge يقول...

سامحنا شاعرنا ,ادري والله مقصرة
ومتاخرة وكل شي بس المسامح كريم :)

Sweet Revenge يقول...

يا صباح الحكم:) ,صحيح كلامك ميت لما يكون شخص عادي ,بس في ناس تبي تظل قريبة علشان تاذيك وتكسرك.
قبل كنت اسمع المثل الي يقول "البعد عنه غنيمة "صراحة ماكنت مستوعبته عدل ,في بالي كنت اقول البعد لايضر ولاينفع بس فعلا في ناس البعد عنهم اكبر غنيمة "لامنهم ولاكفاية شرهم
وصدقني ما اخذ هالقرار الا بعد تفكير وموازنة وقناعة كاملة ان هالانسان ماراح احصل منه الا الاذي والمشاكل
منورنا ميت وشكرا علي الاضافة القيمة.

Sweet Revenge يقول...

فــــاتو شلونج يا قمر
انا اقولج شنو اقصد بس ما ابي ينفهم من كلامي اني قاعده احرض الازواج والزوجات علي ازواجهم وزوجاتهم
الا الاستقرار العائلي انا معاه قلبا وقالبا ;)
الي اقصدة فاتو ان في بعض العلاقات مؤلمه ومتعبه يصير من الصعب معاها الاستمرار في حياه صحية وسليمة يعني مثلا
الشغل ممكن شخص يقول والله انا عندي مدير مؤذي وما اقدر اهد الشغل او زوجة تقول زوجي مؤذي ولكن ما اقدر اتركه
قاعده اقول ان في اختيار للانسان
في العمل ممكن يترك العمل ويدور علي عمل ثاني وهكذا ليش تهون نفسج عليج لاهدرجة وتتحملين وضع ممكن ياخذك لامراض وعلل نفسية وجسدية .
حتي في الزواج انسان متاذي من شريك حياته ,الله حلل الطلاق لحكمة ,وهذا شي من حق كل انسان فينا .
واكرر انا مو قصدي تحريض احد علي احد بس همن نفسي لها حق علي ولازم اهتم فيها ,هذي امانه اتحاسب عليها .
وناطرة تكملة الحديث :)

Sweet Revenge يقول...

يا حيا الله منال
حكمة قلتيها والله "وكل انسان يدور راحته والطريقة الي تخليه ينتج في المجتمع
ويعيش ويتعايش مع الناس"

لما اكون مرتاحة وفي محيط مستقر نوعا ما راح اقدر انتج ,كلنا نسعي للتعايش مع الاخرين بدون ضرر ولا ضرار.
تسلمين لي علي هالكلام الواعي :)

Sweet Revenge يقول...

بووووووحة :يا هلا ويا مرحبا
وهذا اصعب قرار ,لما البعد يكون عن احباب واصحاب ويارب ماالله يكتبها علي احد
منورتناانت والله بوجودج العسل يا عسل :)

Fishah يقول...

من حقج طبعا

كل انسان وله مطلق الحريه باختيار افراد دائرتيه الاخيريتين
ولو انه فيه افراد من الدائره الاولي ودج لو تحذفينهم بالثالثه بس الواحد شيسوي مجبووووور لوووووول
اهم شي تحسين بالراحه

:)

Sweet Revenge يقول...

يا هلا فشه ,شلونج :)

"ولو انه فيه افراد من الدائره الاولي ودج لو تحذفينهم بالثالثه بس الواحد شيسوي مجبووووور لوووووول

اي والله في ناس مال حذف بس شنسوي الله كريم

مرورج غالي فشة لاتقاطيعين ;)

charisma يقول...

اهم شى انتى وراحتج مع نفسج
:***

مس يو

Sweet Revenge يقول...

يا هلا ويا مرحبا كاريزما اي والله ولا اهد هالناس العسل واجابل غيرهم مايصير ;)
والله انت الي وحشتينا ووحشتنا البوستات الناعمة الرومانسية :)

قانونى كويتي يقول...

مساء الخير

يعطيج العافية

وبانتظار القادم


تحياتى لج

Sweet Revenge يقول...

الله يعافيك قانوني ,شكراااا :)

Nikon 8 يقول...

مبارك عليج الشهر :)

fatto يقول...

مبارك عليج الشهر ياحلوه :)

charisma يقول...

مبارك عليج الشهر حبيبتى

Bloggerista يقول...

انا اقول من حقج تعطين أي أحد كرت أحمر حتى لو كانوا من الدائرة الأولى

في ناس عدم وجودهم بحياتنا أبرك



مبارك عليج الشهر يا حلوة :***

Sweet Revenge يقول...

Nikon 8


علينا وعليج نيكون ويتقبل الله طاعتكم وصيامكم وقيامكم


fatto


علينا وعليج يا قمر ;)


charisma


يا هلا باحلي كاريزما كل عام وانت من الله اقرب واقرب وعساكم تعودونه كل سنة وكل عام


Bloggerista
والله ودي يا بلوقرست بس مو حاصلي
فعلا بعض الناس البعد عنهم راااااحه
كل عام وانت لاف صحة وعافية :)

7osen يقول...

مبارك عليج الشهر

وعساج من عوادة

mellow يقول...

لوووووووووووووووووووووووووووول
قعدت اكركر على المقدمة ، تحس وحدة عندها وجهة نظر و تبي تدش في الموضوع و مستعيلة بس بروتوكولات التدوين تحتم عليها إنها لازم تكتب مقدمة.

بس إنتي لخصتي كل شي بهالجملة

"ليش اقبل بالاقل وانا اقدر علي الافضل"

درر ...درر.


لا تقبلين إلا بالأفضل حتى في علاقاتج ، و حتى مع أعز الناس "لأن ساعات يمكن من غير قصد و يمكن من الميانة الزايدة ينسون يعاملونج المعاملة إلي تليق فيج ... لازم تذكرينهم"

وليش نتنازل عن الأفضل؟
الرسول صلى الله عليه وسلم أمرنا لما ندعي ، أن نسأل الله الدرجات "العلى" من الجنة ، مو أي درجة.

بكل شي بحياتنا (وبآخرتنا) قاعدين نتحرى فيه إختيارنا للأفضل ...فليش مايكون هالشي بعد بمجال العلاقات؟

بس في نقطة ...إن حتى أسوء الناس إلي يمرون بحياتنا علاقتنا فيهم تعلمنا دروس و عبر ، بس إذا تعلمتي الدرس منهم لا تطولين معاهم ...هديهم ;)

Sweet Revenge يقول...

حسين علينا وعليك وعساك من عوادة كل سنة وكل عام :)

Sweet Revenge يقول...

p: يا فاهمني انت
شسوي بعد مابي ادرعم علي الاوادم بتنحنح
صاجة والله نبهتيني علي هالحديث ,وايد ناس يقوولون لاعادي وخلج مرنه بس شفت ان لما تتوقعين الافضل بتحصلين الافضل.
الله يسعدلي هالصباح ويسعدلي صاحبة التعليق العسل والله بروحي قعدت اضحك في الدوام :)

جنون الكويت يقول...

مبارك عليج الشهر سويت

غير معرف يقول...

السودان أرض مصرية

لم يعد مخطط تقسيم السودان إلى دويلات – بالأمر السري الذي تتداوله أجهزة مخابرات الدول الكبرى بل أصبح متداول فى وسائل الأعلام الأوروبية و الأمريكية . فالسودان سيتم تقسيمه إلى خمسة دويلات هي : دارفور ، جبال النوبة ، الشرق ، السودان الجديد ، السودان الشمالي والمقصود بالسودان الجديد – بداهةً – جنوب السودان. ويهدف هذا المخطط لخدمة “إسرائيل” أولاً وأخيراً، وحرمان العرب من أن يكون السودان الغني بأراضيه الخصبة وموارد المياه “سلة الغذاء العربية”، ومحاصرة واستهداف مصر، بالتحكم في مصدر حياتها، أي مياه النيل، ودفعها لأن تضطر إلى شراء مياه النيل بعد اجتراح قوانين جديدة بتقنين حصص الدول المتشاطئة القديمة والدويلات الجديدة…………………….

ارجو من كل من يقراء هذا ان يزور ( مقالات ثقافة الهزيمة) فى هذا الرابط:

www.ouregypt.us

صبا يقول...

سويتااااااا

شخبارج ...

:**




مبارك عليج الشهر


وينعاد عليج ..وعلى اسرتج.. والي يعزون على قلبج وانتوا.. باحسن حال

الله يقدرنا على صيامه وقيامه يارب


:**








:****

Sweet Revenge يقول...

علينا وعليج جنون الكويت ,ماتقصرين :)

Sweet Revenge يقول...

يا هلاااااا ويا مرحبااااااا شلونج صبا شخبارج وينج ليش مسكرة هالمدونة
مشتاقين يالغالية
علينا وعليج يتبارك وعساج تعودينه كل سنة وكل عام :)

fatto يقول...

صح كلامج والله .. في ازواج الله يعينهم على بعض .. قاعد اسمع مآسي .. وقاعد افكر اشلون هذي عايشه معاه ليل حين او العكس .. يعني انشاءالله حاادهم .. تعذبو واستمرضو وشيبو .. هذا كله سببهم نصبر علشان لعيال .. بس اذا تميتو ابعلاقتكم لعيال اصلا راح يضيعون .. انا عندي اذا ابتعدو احسلهم وحسن حق عيالهم .


وشكرا للتوضيح حبيبتي :)

Sweet Revenge يقول...

"تعذبو واستمرضو " هذا هو فاتو العلاقات المريضة تسبب امراض وبلاوي والعياذ بالله ,فليش استمر في علاقة ادري راح تتعبني وتمرضني ,العيال شراح يستفيدون من العيشه في جو كله مشاكل وشحن
حياج فاتو والله يعطيج العافية

فضفضه يقول...

أكيد من حقج .. لأنج قاعده توفرين على نفسج مشاكل و عوار راس انتي في غنى عنه .. إختيار الصديق و تحديد دائرته من الاشياء الدقيقه و المهمه في هذي الحياه ..

Sweet Revenge يقول...

يا هلا فضفضة حياج الله مدونة جديدة معانا
نورتينا :)

بـابـل يقول...

شكرا للصدفة الحلوة اللى وصلتني هالمكان الدافي

كل عام وأنتي بخير


وبس


بابل

Sweet Revenge يقول...

يا هلا بابل وانا كذلك اشكر هالصدفة الي تعرفنا فيها عليك
كل عام وانت بالف صحة وعافية :)

اعتراف عاشقة يقول...

من حق كل إنسان أن يختار من حوله .. صح هنالك أناسا مفروضين علينا ولكن ما باليد حيلة ؟؟ فلنحاول إخراجهم عن الدوائر المقربة الينا ونضعهم في الدوائر البعيدة ونتكفى شرهم :)... بوست رائع...دمت بخير عزيزتي

Sweet Revenge يقول...

ماتقصرين عاشقة وشكرا علي مرورج شرفتينا :)

خلفية

Leelou Blogs