الخميس، 18 ديسمبر 2008

مدهش!!!!!



السلام عليكم شلونكم مدونين شخباركم


ان شاء الله استانستوا بعطله العيد


بالنسبله لي امل من العطل الطويله بس هالمرة كانت غير ارتحت وايد بالعطله كنت محتاجتها بمعني الكلمة والحمد لله
___________

وحدة من صديقاتي لها سفرات متكررة لدبي وماتنسانا من الصوايغ , مرة من المرات اسلتني شنو تبين من دبي؟ قلت لها ,ابي مدهش


ابي مدهش نفسه بالحجم الطبيعي P:.


ماكنت ابي اكلف عليها شي بس يمكن هذا اول شي طرا علي بالي لما سالتني .


مدهش ,اظنتي اختيار الاسم ماكان من فراغ ,فكل شي في دبي مدهش .


كل شي وصلتله دبي مدهش .


بس رؤيه محمد بن راشد, حلمه بالنسبه لي اهو الشي المدهش الحقيقي


دبي كانت سبخات قبل واليوم تنافس مدن عالمية .


تجرأ بن مكتوم ان يحلم وحقق حلمة .


"حنان" كان عندها حلم طلب منها زوجها انها تتخلي عنه وتتفرغ للبيت وبعد 16 سنه تركها ,تعبتني دموعها وهي تتكلم عن حلمها الي كان مفروض يكون لو ما .


"جميله" همن كان عندها حلم بس تخلت عنه بارادتها لان ماتبي تتعب علي متطلبات حلمها الي محتاج شغل وجهد كبير وتركته.


امس بالصدفة كنت اشوف برنامج مسابقات للمواهب ,ناس عندها مواهب تعرضها للجمهور والجمهور يقرر الفائز .


بعض هالمواهب كان مضحك ومحرج حتي بس اعجبتني شجاعتهم للسعي لاحلامهم للنهاية حتي لو معناه ان راح يحطون أنفسهم في موضع سخرية وضحك .


عندي وايد كافي ان اسعا لاحلامي بكل طاقتي وابذل مجهودي كله علشانها ,قدرت احققها او ماقدرت احققها هذا علمه عند رب العالمين.


بس اكيد راح ادخل نادي اصدقاء مدهش ,الاصدقاء الي لهم الجرأه علي الحلم .
رسوم الاشتراك :حلم من اختيارك .
نبي نشوفكم معانا :)


ونشوفكم علي خير :)

__________


سبخات : أَرْض ذات ملح ونزٍّ لا تكاد تُنبتُ




الخميس، 27 نوفمبر 2008

غربة الكمال





"سعي الي الكمال لايعرف الكلل"

السعي للكمال وسعي للاجاده سعي لتكون

الافضل

الاقوي

الاجمل

الاسرع

هو الكمال باختصار ,في اغلب مانعمل نسعي له ونسعي للاجادة

صحيح الوصول للكمال صعب لانه من صفات الخالق ولكن القرب من نقطة الكمال ممكن

حين تعمل جاهدا لتكون قريبا منها من تلك النقطة التي يسعي لها الجميع

انت وصلت وحدك مع القله لصعوبتها ولوعورت طريقها

يقدرونك

يحترمونك

فانت قدرت ولم يقدروا

انت وصلت ولم يصلوا

يهابونك بسببها

يخافونك من اجلها

فانت الاقرب لها

لا احد يستطيع بلوغها

لااحد يجرا بالاقتراب من قمتك

فلا احد يرغب في ان يكون حيث لا احد

تبقي هناك وحدك

الهواء انقي

والحشود اقل

لك كل المميزات

وحدك

ايديهم لاتطالك

انت شمسهم

تدفأهم

ولكن الاقتراب يحرقهم

وحدك

نجمه متالقه

في سماء صافيه

تري ولا تلمس

فمن يطال النجوم؟

هل ما زلت ترغب بها؟


الاثنين، 24 نوفمبر 2008

واجب



اليوم عندي واجب من الاخت العزيزة بنت بطنها
انا صراحة ما احب الواجبات مع اني اكاديميا كنت متفوقة بس مــــــــــــــــــــــا احب الواجبات .
كنت لما ارد من المدرسة العب لما اشبع تــــــــــــــالي اشوف واجباتي
العادة هذي للاسف للحين عندي ودي اغيرها وان شاء الله راح اغيرها .
يالله خلينا نبدي مع واجب بنت بطنها


بدأت تدون من إمتى ؟ ودخلت العالم ده إزاي ؟
"انا مو فاهمة ليش السؤال بالمصري يعني بتنقصوني اذا رديت بلهجة غير؟ وجم درجة ؟"

انا بديت تدوين يو م13 -7-2008 ماكان في بالي ان راح يكون عندي مدونه كنت اقرا مدونات بس ماكنت اقدر ارد لان ماعندي مدونة وبعض اصاحب المدونات النحس ما كان يفتحون المجال حق الانونمس فقلت يالله خل افتحلي مدونة خل ارد علي الي ابي
شلون دشيت هالعالم : انا قبل كنت اسمع عن المدونات وانتشارهاخاصة بره وفي فترة الانتخابات كان يتكرر اسمع بعض المدونات مثل
كله مطقوق ,وشروق بس السياسية ماتشدني ليما بالصدفة طحت علي مدونة العيال كبرت , تويته يحليلها مدونتها اجتماعية اكثر منها سياسية وتتكلم عن امور واقعية اعجبتني وايد وصرت اتابعها من عقبها علي قولتهم "I was Hooked" ,قمت احوس علي المدونات واقرا وفتحت مدونتي علشان اتفاعل مع اصحاب المدونات .


أيه كان انطباعك في البداية ؟
في الاول كنت مستانسة ,ولما اكتب احس اني سويت انجاز لاني بصراحة مو شاطرة بالتعبير عن افكاري ,تالي حسيت اني توهقت
ياربي الناس كل يوم كاتبه بوست وانا @@ ,بس بعدين خذيت الموضوع بساطه وكل ماقدرت نزلت بوست .


من أكثر شخص بتهتم بتعليقه على ( بوستك ) الجديد ؟
الكل فيهم الخير والبركه ,واستانس من التعليقات سواءا سلبا او ايجابا لان اتعلم منها صراحة .


ما هو أهم شيء تعلمته من عالم التدوين ؟
ان حتي لو محد يعرفني لازم احترم عقول الناس الي تقرالي واتعامل معاهم بعداله وانصاف.
كلمتي اذا طالعه من القلب راح توصل وراح يحس فيها الي يقرا حتي لو مايعرفني ولامرة شافني .


ما هو أكثر شيء كرهته في عالم التدوين ؟
المدونين الي يستخدمون مدوناتهم للتطاول علي الناس او المقدسات.


هل تشعر أن التدوين له تأثير؟
اذا كان القصد التاثير علي المحيط فاكيد ياثر, الكلمة تاثر سواء كانت في جريدة او مدونه .
اما اذا كان القصد تاثيره علي فخلاني الاحظ شغلات ماكنت الاحظها من قبل , انتبهت لها من بعض المدونين .


تهدي ( التاج ) ده لمين ؟
ااااااااايه التاج باهديه حق
the boss
365
londony

في النهاية مشكورة يا بنت بطنها علي الواجب اممم الصراحة حسيت جنه لقاء صحفي وانا صباح P:
بس رجاااااااااااااااااااء حااااااااااااااااار للكل لااااااااااااااااااااااا احد يدز لي واجبات ما احب الواجبات :"(
والله احب اكتب علي راحتي لما اسمع كلمة واجب احس ايديني مربطة "يعني حالتي تصير كسيفة "يرضيكم يعني

الأربعاء، 5 نوفمبر 2008

أشمعنه!!!!




صباح الخير ,وحشتوني وايد ,شلونكم مع هالاجواء الرائعة الصراحة مخليه الواحد مرتاح غصبن عليه ,لو يصير شي يعصب ماني قادرة
اعصب لووووول ,الله يتمم علينا نعم الخير والمطر امين .


يا جماعة ماني قادرة اسكت من بدت السالفة وانا اقول تعوذي من ابليس يا سويت مالج شغل بس ماني قادرة لازم اتحجي واعبر, ابليس مو
راضي يهدني في حالي يوزني "اعوذ بالله منك يا شوشو "المهم هالمرة بطيعه وامري لله واتكلم في السياسة


اهي مو سياسة سياسة بس الحدث كبير وغصب عليك لازم تتفاعل معاه .


الانتخابات الامريكية "سويته اول ماتشطح تنطح سيده علي الانتخابات الامريكية"


انا موهامتني الانتخابات كلها لان امريكا دولة مؤسسات وسياستها الخارجية عموما ماتتغير تغير كبير بتغير الرئيس بس


الرئيس اليديد "براك حسين اوباما "اهو الاهم بالنسبة لي .


شخص آمن بالامل ايمان حقيقي ,آمن بالتغير وامن ببلده امريكا ,ماخالطة شك من البداية انه راح يوصل لمنصب
الرئيس
علي كل الشكوك الي كانت تدور حوله "مرة شيوعي ومرة ارهابي ومرة ومرة ",و علي الرغم من اصوله ,وتربيته
وتنشئته .


ماكان في نفسة ذرة من الشك انه انسان ,مواطن ويستحق الفرصة وان قادر علي احداث التغير .


ما انكر اعجابي فيه ثقة ,قوة ,وتعليم عالي تعب علي نفسه وايد مو شويه والاهم قريب من شعبة فاهم معاناتهم, بكل
بساطة اهو واحد فيهم .


براك فاز لان كل امريكي شاف نفسة في براك اوباما ,شاف ان اذا براك وصل انا بعد اقدر اوصل , جدد
آمالهم واحلامهم بالنجاح والوصول للاهداف مهما كانت صعبة ومستحيله .


يقدر او مايقدر علي مهام منصبه اليديد الصراحة ما ادري ,ولو ان شخص مثله اكيد يقدر ,بس الاهم ان وصل وكسر
الحاجز .


حماسي له كان لان يعطي مثال واضح علي قوة الايمان ,قوة الايمان بنفسك ومعتقداتك وقدرتك علي النجاح في اي مجال
مهما كان ,حماسي له لان لما نتكلم عن امكانية الوصول والنجاح ماراح يكون مجرد كلام انشاء لا ,
كا براك اوباما اشمعنه ! ماكو حجة لاي واحد يقول لا صعب أو مستحيل ,اشمعنه براك !!!
ما استعيل براك خذاها خطوة خطوة بس وصــــــــــــــــــــــــــــــل.
امريكا انتخبت "براك حسين اوباما " لان وثق فيها وبالتالي اهي اوثقت فيه, لااكثر ولا اقل .


انت ! قادر تثق بوطنك , باهلك , بنفسك, بقدراتك؟؟؟؟ وبالتالي يبادلونك الثقة وكلنا نفوز


مبروووووووووووووووووووووووووووووووووووووك من قلبي لك يا" بو حسين "قدها والله .



ومثل ماقلت يا بو حسين

'All things are possible'

الاثنين، 13 أكتوبر 2008

يخون الود



ما عدت اثق فيه خاني ,غدر فيني ,طول عمري عودني
انه يكون واضح وصحيح بس اخ خ خ خذلني هالمرة
عقب كل هالعشرة خذلني مو مرة مو مرتين لا اكثر والياي اكثر .
بس ليش شصار؟ ليش غير عاداته فجاة مو عوايده
يمكن مرهق تعبان,يمكن زحمة الحياة
خلته يضيع طريجة ,ابي احصل له عذر ما اقدر استغني
عنه راح اضيع بدونه انا اهو واهو
انا .
يمكن احسدوه اي اكيد اهي عين ماصلت علي النبي .

ولا متعمد شافني معتمده عليه قال اخون علشان تعرف قدري .

اهي غلطتي انا اعتمدت عليه وايد وحب يعلمني درس,
بس اي درس صج انه معاي بس ماكنت اعتمد علية
بالكامل كنت اقوم بواجبي واهو كان ياكد لي اي قرار اخذه ويسانده .

يمكن صلاحيته انتهت ويبيله تغيير ,بس ماينباع ولا ينشري
اعرفة ماله مثيل.
الظاهرضغطت عليه وحملته فوق طاقته بس ولو .....

شسوي دلوني

خاني " احساسي انا" الي دوم صادق
معاي قام يخوره هالايام,احساسي الي دوم اعتمدت عليه ووثقت فيه,خان غدر فيني .

"احساسي انا " يعطي ثقته لناس ماتستاهل
وانا اطيعة ,يصدق الجذاب ويجذب الصادق وانا
ما اقوله لا.

قام يعيش باحلام وردية ويعيشني معاه وتالي
يقطني علي صخر,ويضحك ويقول محد قالج
تصدقيني !

قبل ماكان يسوي فيني جذي ,كانت كلمته ماتنزل الارض والكل يحلف فيه, ثقة .
كنت افتخر فيه" احساسي انا" يقول.... "احساسي انا"يعيد ......,"احساسي انا" ما يجذب صادق ....., ادري
مدام قال هذا صح يعني صح وكانت الايام تثبت كلامه ,ثقتي فيه بناها في سنين والحين يبي
يهدمها فلحظة بتصرفاته الطايشة شالدبرة معاه يا ناس وانا مالي غناة عنه ؟
هذا" احساسي انا " .
_____________________________________
"يا جماعة الموضوع مافيه رياييل كلش ولا خيانة ولا شي من هذا ,انا اتكلم عن احساسي بالناس والاشياء اهو الي تغير علي ,قاعدة اتكلم عن شعوري واحساسي كانه شخص
هذي كل السالفة ,فضحتوني /:"

الاثنين، 6 أكتوبر 2008

العيد جاء اهلا به

السلام عليكم ,شلونكم يا اهل المدونات عيدكم مبارك وتقبل الله منا ومنكم صالح الاعمال
بالنسبة لي
اول يوم العيد اهو اهم يوم ويمكن اليوم الوحيد الي احس فيه بالعيد باجي ايامه تمر علي بطريقة عادية مثل
اي يوم ثاني , صلاة العيد ,العيادي وريو ق العيد اهم الي يخلون هاليوم مميز عن غيرة من ايام العيد .
بالنسبة لي كان السنة مميز اكثر :), قعدت مبجر علي غير العادة وطلعت همن مبجر وصلنا مصلى العيد
وقعدنا ننطر الصلاة ,احب فرحة العيد بعيون الاطفال وملابسهم اليديدة والي لفت نظري السنه الحنه ,وايد
بنات متحنين صغار وكبار كانت هذي من عاداتي واناا صغيرة ,يدتي الله يرحمها كانت تحطلي كمية في
ايدي بالليل وتربط ايدي بخرجة علشان تثبت الحنة وماتتفتت ,ظنيت ان الناس نست هالعادة الحلوة بس
الظاهر موضة السنة ;) ودي اتحنا مثلهم ,للحين احنا في مصلي العيد الوقت يمروالمصلين يزيدون شوي شوي بس ما اسمع
التكبيرات وماكو صلاة امممممم شسالفة ,ماكو صلاة؟
طلع المكرفون خربان والرياييل يصلون بدونا !!! نعم!!! انا قاعدة من الصبح علشان صلاه العيد وانتوا
بتصلون بدونا طبعا لحقنا عليهم وخلصت الصلاه ورجعنا البيت.
اول يوم العيد وصلني اتصال الصراحة ماتوقعته ,وصلني من صديقة بعدتها الايام ,حيل عزيزة علي
ومتفقين وايد بس مشاغلها بعدتها كنت اظن ان حبل الوصل انقطع بس اتصلت هنتني بالعيد .
دايما يقولون ان رمضان والعيد فرصة لنبذ الخلافات والاحقاد والتواصل ,بالنسبة لي ما كنت احس هالكلام
ينطبق علي لان الحمد لله مالي عداوات تذكر .
بس سارة مو عدوه ,صديقة ظنيت اني فقدتها من زحمة الايام بس العيد رجعها لي :),كانت مفاجاة سارة من سارة وعسا
كل ايامكم اعياد وافراح .
نشوفكم علي خير

الثلاثاء، 9 سبتمبر 2008

أحب رمضان

السلام عليكم ,شلونكم وشخباركم

شلونكم مع رمضان وليالي رمضان

أحب رمضان واشتاقله ,احب ايامه ولياليه .

احب الجمعات والزيارات في رمضان.

احب الروحانيات العالية الي تكون في كل مكان.

احب اقبالنا علي الطاعات اكثر في هالشهر .

احب التراويح والمصلين والمساجد المليانه "وعسا دوم مليانه" .


احب الامهات الي ياخذون بناتها للصلاة ويعودونهم علي حبها .

احب اصوات المآذن ,والاما م الي يقرا القران "بعض المساجد ماتسكر المكرفون وهذا يعطينا احساس

مختلف بالشهر مع ان في ناس ما يعجبهم هالشي " .

احب تجمعنا علي سفرة وحدة في وقت واحد علي الفطور.

احب كرتون" فريج" لووووووووول.

احب الدوام القصير في رمضان .

واحب القطايف والفيمتو بس في رمضان p:

وانتوا شتحبون ؟

الأربعاء، 27 أغسطس 2008

قهوتي



صباح الخير ,شلونكم شخباركم ياربع المدونات


وايد ناس تبدي يومها بفنجان قهوة ,بالنسبة لي ماني من محبين القهوة
ابدي يومي بشاي حليب ,القهوة وقتها عندي
نص النهار لما اكون فعلا محتاجه جرعة كافيين تساعدني علي اليقظة لباقي النهار .


انا ما اطلبها في المكتب من اشتغلت وعامل الكفتيريا الي
عندنا يحطها علي مكتبي الساعة 12 بالضبط الصراحة في بداية شغلي
كنت استغرب بس كنت اشربها ,لان محتاجتها .


قلت لكم ما اميل للقهوة وايد وقررت في فترة ان انقطع عنها ,كان عامل
الكفتيريا ايبها الساعة 12 بس ماكنت اشربها
هالمرة ويشيلها اخر الدوام ,الي ان يوم سالني
انت ماتحبين قهوتي ؟قهوتي فيها شي ؟كان يقولها بتاثر واضح


تضايقت من روحي وايد ,انا ما بلغته بقراري ولا قتله يوم ان قهوته حلوه .


تذكرت احباطي اذا انجزت عمل والمدير خذاه بدون شكرا او بسمة رضا


تذكرت الكلمات الحلوة المشجعة الي اسمعها والي اتذكرها مهما مر عليها من سنين


راح انجز عملي واقوم بواجبي حتي لو ماسمعت هالكلمات او اللفتات الجميلة بس شكثر راح تفرق معاي لو سمعتها


بالنسبة لعامل الكفتيريا هذا شغله و انجازة ,تضايق لرفضي لشغلة بدون ابداء اسباب ؟


شغلات صغيرة ننساها في زحمة الايام ,ابتسامة صغيرة ,سلام ,سؤال عن الاحوال ,شكر ,هدية بدون مناسبة


تذكر سعادتك وانت تحصل علي هالاشياء والابتسامه الكبيرة المرسومة علي ويهك الحين وانت تتذكر


احبابنا اصحابنا اهلنا محتاجين هالشغلات الصغيرة مثل ما احنا محتاجينها راح تفرق معاك ومعاهم وايد


ابشركم كل يوم اشرب قهوتي الساعة 12 ,فرنسية وطبعا سويت :)


نشوفكم علي خير

الجمعة، 8 أغسطس 2008

خايفة!


كل ما حاولت اكتب ما يطري علي إلآشي واحد "الخوف" , وانا في اول بوست قلت ابيها واحة لي ولكم بس مسيطر

علي هالاحساس بطريقة غريبة ,خايفة من كل شي.

من واحنا صغار تحذيرات الوالد والوالدة خاصة من كل شي ومن اي شي يمكن اهي الي زرعت فيني هالاحساس الي ما

احبة , ما احب اني اخاف ودايما احاول اتخلص منه , شفت ان افضل وسلة للتخلص من احساس الخوف ان اسوي

الشي الي انا اخايفة منه ,اذا خايفة من البحر ادخل فيه "تري صج احب البحر بس اخاف منه لوووووول"

هذا اذا كان مصدر خوفي شي محسوس , اما اذا كان شي مو محسوس مثل المستقبل "ومنو ما يخاف منه "افكر بربي

واشلون ان ثقتي فيه راح تعديني لبر الامان .

بس فيني خوف مو عارفة اتخلص منه للحين ,يمكن هذي المدونة تساعدني اتخلص منه اخاف اتكلم عن نفسي

اول مرة سمعت فيها عن المدونات وماهيتها قلت في نفسي "اكو واحد عاقل يتكلم عن نفسة اما الملأ وفي النت

"بالنسبة لي كان ضرب من الجنون "نوعي متحفظ جدا بما يخص حياتي الشخصية واتضايق عن الي يسالني عن

نفسي حتي لوكان سؤال بسيط مثل نوع قهوتي او لوني المفضل يمكن تكون مبالغة مني بس هذا طبعي وشفت من الايام

ان كل ما قلة المعلومات الي تكشفها عن نفسك كان اسلم واحفظ

ومن خاف سلم .

"مو اقولكم خوافة :)" ماكو فايدة , بس الحين عندي استعداد ان اتشارك معاكم في بعض الاشياء مو كل "بعض "

واتمني اكسبك اخوان وخوات لي .



الخميس، 24 يوليو 2008

احسدكم ..........

السلام عليكم
شلونكم شخباركم عساكم طيبين يا اهل المدونات

الصراحة احسدكم جدا جدا جدا .......................................
الحمد لله ما احب الحسد ولا احب احسد علي نعمة الله سبحانة عطاها لاحد لان اهو العاطي الوهاب اذا ابي شي برفع ايدي ادعي واقول يالله والصراحة احس الحاسد انسان جدا جدا غبي ,اي والله واحد مستانس بنعم الله علية وانا اطحن بروحي ولا احد دري عني بس واخ من بس احسد اثنين خل نقول غبطة مو حسد لاني مااتمني تزول النعمه عنهم بالعكس اتمني اتمني تززززززززززززيد لانه يمتعونا بنعمهم
احسد الكتاب سواء كان شاعر او كاتب (اي شكل من اشكال الكتابات الادبية ) , واحسد الفنانين سواء كان رسام-نحات -موسيقي
لان هالنوعين لهم قدرة علي ترجمة مشاعرهم الي شي جميل الناس تستمتع فيه .
جم مرة قريت قصيده اثرت فيك وحسيت انها تتكلم عنك وتعبر بالضبط عن الي في داخلك
جم لوحة هزتك من داخل وتمنيت لو انت الي راسمها وجم وجم
الانسان العادي وسائل التعبير عنده محدودة (صراخ _ضحك_بكاء_تحلطم لوووول-بوز ممدود_ابتسامة_صمت)
بس الكتاب والفنانيين وسائل تعبيرهم غير محدودة وناتج هالتعبير ممكن يستمر ايام وممكن يدوم العمر كله.
مؤخرا اكتشفت ان اصحاب المدونات يندرجون تحت فئة المحسودون في الارض من قبل شخصي الكريم , تعبرون عن مواضيع كثيرة ,مواضيع خطيرة ,جريئة ,هادية ببلوك صغير مايتعدا اسطر .
اعترف ماعندي هالملكة او هالميزة ,اتمناها بشدة وراح ارفع ايدي واقول يارب واذا ما الله كتب وصارت عندي
ادري راح تكونون موجودين ببلوقاتكم ,بقصايدكم وبلوحاتكم تساعدونا نعبر عن الي في ذواتنا ,وتكونون صوتنا للكل.

p.s
فنانة تعبر عني وايد "الليدي ماجدة "

http://www.youtube.com/watch?v=qmsZiK1mWQM


الخميس، 17 يوليو 2008

من ينتصر..............

وَقَالَتْ لِيَ الأَرْضُ - لَمَّا سَأَلْتُ : " أَيَـا أُمُّ هَلْ تَكْرَهِينَ البَشَر؟"
أُبَارِكُ في النَّاسِ أَهْلَ الطُّمُوحِ وَمَنْ يَسْتَلِـذُّ رُكُوبَ الخَطَـر
وأَلْعَنُ مَنْ لا يُمَاشِي الزَّمَـانَ وَيَقْنَعُ بِالعَيْـشِ عَيْشِ الحَجَر
هُوَ الكَوْنُ حَيٌّ ، يُحِـبُّ الحَيَاةَ وَيَحْتَقِرُ الْمَيْتَ مَهْمَا كَـبُر
فَلا الأُفْقُ يَحْضُنُ مَيْتَ الطُّيُورِ وَلا النَّحْلُ يَلْثِمُ مَيْتَ الزَّهَــر
وَلَـوْلا أُمُومَةُ قَلْبِي الرَّؤُوم لَمَا ضَمَّتِ المَيْتَ تِلْكَ الحُفَـر
فَوَيْلٌ لِمَنْ لَمْ تَشُقْـهُ الحَيَـاةُ مِنْ لَعْنَةِ العَـدَمِ المُنْتَصِـر!"
ابو القاسم الشابي

الأربعاء، 16 يوليو 2008

يقولون..............

السلام عليكم شلونكم شخباركم يا ضيوفي الكرام ,تاسيس مدونة لي ما هو لغرض معين لا سياسي ولا اقتصادي ولاولا ....
كل المسالة اني كنت ازور المدونات واقرا واستمتع واحب اعبر عن شكري لهذا او ذاك علي المواضيع الي يعرضونها وتالي
يازتلي الفكرة وحبيت انها تكون استراحة وواحة لي ولكم نرتاح فيها من الازعاج الي حوالينا والي ماله نهاية .
ازعاج قال ويقولون وعلي طاري يقولون سمعتوا شيقولون :

يقولون والكلام فنون شالي ينن المينون مهب العيون
في عين تذبح ذبح هادي وفي عين تذبح ذبح سادي
في عين تاخذك اخذ وردي وفي عين تاخذك اخذ رعدي
شنهي العيون ,سما العيون , بحر العيون , هل هي شي او مليون ؟؟

اتفق مع الشاعر عبد الرحمن رفيع العين تقودك للجنون, قادتني للجنون $:

بس قبل ما اقولكم شلون العين قادتني للجنون تعالو شوي نسولف عن العين

العين واضحة وصريحة ,مستقلة يعني شورها من راسها ماترد علي احد

يعني مثلا اذا انت زعلان وتبي تبينها مستانسة تقولك انساااا , واذا انت تعبان وتبي تبينها مرتاحة تقولك مشكلتك مووووووووو مشكلتي

مرات بيني وبينها اقولها انا ما احب فلان بس لاتقولين له , تقولي مو علي كيفج انا ماجذب لا الف ولا ادور

مرة اقدر عليها ومراااااااااااااااااااات ما اقدر عليها ,يننتني ,فتختني

بس لازم اعترف ,العين محارب قوي ولا زم احذركم الي ما راح يعرف شلون يتعامل معاها راح يصير فيه مثل صاحبنا

لم يردة الف جرح من فواجعة*** حتي اصيب بسهم منك اردااااه ...... الله يرحمة:'(

وكلش كلش تاخذك اسير واسراها يأنون ويشتكون "كفي القتال وكفي اسر قتلاك*** يكفيك ماصنعت بالناس عيناكي "

مابين قتيل واسير لازم اشوفلي حل


اتفاهم معاها ولا راح اكون الضحية القادمة :(

وردوا قالولي وياما يقولون .

قالولي العين , كل عين لها كتيب خاصة فيها و في شفرة مشتركة بينهم اذا عرفتيها سلمتي

بس من وين اتعلمها ؟

قالولي من العيون الناس لما تشاركينهم افراحهم واحزانهم لما تحسين فيهم وباحلامهم وطموحاتهم وتكونين معاهم

ذيك الساع بس راح تعرفين ليش .........

ليش اهل اهوي يقولون ... يقوولون والكلام فنون
شالي ينن المينون مهب .................................................... العيون

الأحد، 13 يوليو 2008




حياكم الله :)

خلفية

Leelou Blogs