الاثنين، 13 أكتوبر 2008

يخون الود



ما عدت اثق فيه خاني ,غدر فيني ,طول عمري عودني
انه يكون واضح وصحيح بس اخ خ خ خذلني هالمرة
عقب كل هالعشرة خذلني مو مرة مو مرتين لا اكثر والياي اكثر .
بس ليش شصار؟ ليش غير عاداته فجاة مو عوايده
يمكن مرهق تعبان,يمكن زحمة الحياة
خلته يضيع طريجة ,ابي احصل له عذر ما اقدر استغني
عنه راح اضيع بدونه انا اهو واهو
انا .
يمكن احسدوه اي اكيد اهي عين ماصلت علي النبي .

ولا متعمد شافني معتمده عليه قال اخون علشان تعرف قدري .

اهي غلطتي انا اعتمدت عليه وايد وحب يعلمني درس,
بس اي درس صج انه معاي بس ماكنت اعتمد علية
بالكامل كنت اقوم بواجبي واهو كان ياكد لي اي قرار اخذه ويسانده .

يمكن صلاحيته انتهت ويبيله تغيير ,بس ماينباع ولا ينشري
اعرفة ماله مثيل.
الظاهرضغطت عليه وحملته فوق طاقته بس ولو .....

شسوي دلوني

خاني " احساسي انا" الي دوم صادق
معاي قام يخوره هالايام,احساسي الي دوم اعتمدت عليه ووثقت فيه,خان غدر فيني .

"احساسي انا " يعطي ثقته لناس ماتستاهل
وانا اطيعة ,يصدق الجذاب ويجذب الصادق وانا
ما اقوله لا.

قام يعيش باحلام وردية ويعيشني معاه وتالي
يقطني علي صخر,ويضحك ويقول محد قالج
تصدقيني !

قبل ماكان يسوي فيني جذي ,كانت كلمته ماتنزل الارض والكل يحلف فيه, ثقة .
كنت افتخر فيه" احساسي انا" يقول.... "احساسي انا"يعيد ......,"احساسي انا" ما يجذب صادق ....., ادري
مدام قال هذا صح يعني صح وكانت الايام تثبت كلامه ,ثقتي فيه بناها في سنين والحين يبي
يهدمها فلحظة بتصرفاته الطايشة شالدبرة معاه يا ناس وانا مالي غناة عنه ؟
هذا" احساسي انا " .
_____________________________________
"يا جماعة الموضوع مافيه رياييل كلش ولا خيانة ولا شي من هذا ,انا اتكلم عن احساسي بالناس والاشياء اهو الي تغير علي ,قاعدة اتكلم عن شعوري واحساسي كانه شخص
هذي كل السالفة ,فضحتوني /:"

هناك 38 تعليقًا:

kuwaitawy يقول...

comming back soon with arabic keyboard :)


because there are alot of word i have to say it :)

Sweet Revenge يقول...

حياك الله المكان مكان ,وانا في الانتظار
لازم تشوفولي حل

david santos يقول...

Really beautiful posting!!!
Congratulations!!!
Have a nice week.

gawga3a يقول...

الله يعينج حبيبتي :( حسبياالله على كل خاين .. انا حاسه فيج .. الي يبيعج بيعيييييه .. ادري صعب بس لازم اتدوسين على قلبج اشواي .. وادري راح اتعذبين بس شتسووين .. وعلى قولتج عطيتيه اكثر من فرصه هذي مو اول مره يخون .. العن ابو الحب

Sweet Revenge يقول...

ديفد سانتوس :حياك الله وشاكرة مرورك
الطيب :)

Sweet Revenge يقول...

ههههههههه ضحكتيني قواقع يحليلج
انا ما اقصد الي فهمتيه
انا اقصد ان قبل كنت احساسي ما يخيب
يعني اذا حسيت هذا انسان طيب فعلا يطلع طيب واذا حسيت هذا انسان شرير فعلا يطلع شرير
احس بشغلات قبل ماتصير يعني مثل ماتقولين حاسة سادسة بس الحين ما ادري
مو مثل قبل ما ادري شسالفة
:/

kuwaitawy يقول...

الاخت سويت ريفينج



ممكن احساسج هالمرة غاب لان الشخص دائما تحكمة ظروف اخرى فاذا هذا الشخص تمكن من الظروف لن تتغير شخصية هذا الرجل

لكن

اذا الظروف تمكنت من هذا الشخص فسوف تتغير امور كثيرة بهذا الشخص لكنه تغيير نسبي وبسيط


----------


تمنياتي لج بالتوفيق

Sweet Revenge يقول...

حيا يالله كويتاوي ,انا م اتكلم عن شخص بذاته انا اتكلم عن احساسي كانه شخص
يعني مثلا لما تقول احساسي يقولي جذي او انا حاس ان هالشي صح
هذا الي اقصدة
اقصد شي بيني وبين نفسي متعثر وموفاهمة ليش
شاكرة مرورك واهتمامك ماتقصر :)

AK-47 يقول...

اذا ماتقدرين على فراقه واول مرة يسويها طوفيها

واذا الريال ماخذ راحته شوفي غيره احسن
:)

Sweet Revenge يقول...

ak_47
انا اتكلم عن احساسي مو عن رياييل
شعوري بالناس والاشياء هذا لي اقصدة الله يهداك
مو الي في بالك كلش

بـنـت بـطنـهـا يقول...

كافي ألم مافيني حيل أتألم
حتى السعادة صارت اليوم حسرة

ياما انجرحت وللأسف ما أتعلم
رغم انه نفس الجرح في كل مرة :)

هذا اللي طرا على بالي وانا اقرا بوستج :)

تراب الكويت يقول...

التوضيح بالنهايه شي عجيب هههه

اشوه قريته قبل لا اندمج :$

شوفي الاحساس نعمه
لكن بما انه ليش شي ملموس
فهو يحتمل الخطأ اكثر من الصواب

لا لا تصدقيني
ترى اكثر وحده تمشي ورى احساسها انا
وحتى لو خذلني ما ازعل تدرين ليش

احب اكون الطرف النظيف بالموضوع
احب ما اسيء الظن
وحتى لو اللي جدامي خذلني
يكفي اني وفيت وما قصرت
وهالشي يريحني
فلا تزعلين :**

Sweet Revenge يقول...

سلامت قلبج الغالي يا بنت بطنها ,منورة صارلج جم يوم غاطه
يبا لا حزن ولا شي بس هذا احساسي صاير ما يستحي علي ويه علي اخر الزمن صاير يخورة ما ادري شسوي فيه
عندج حل ؟:)

Sweet Revenge يقول...

تراب الكويت :شسوي لازم اوضح كل من دش حطهاريال خايني ,ريال يخوني اكتب بوست !! الا اروح اذبحة واكتب بوست ابشركم ههههههههههه اجرام الله وكيلجp:

بس شسوي قبل زين وشزينه نسبة الصح قولي 80 % و85% الحين ابد .
واهم شي ان الواحد يأدي واجبة علي اكمل وجة وخلي الي الغلط يطلع من اهله
شاكرة مرورج وتفاعلج معاي
منووووورة :)

THE BOSS يقول...

لو كل شي بل الاحساس بس
ولو كل واحد صدق معاه احساسه
جان محد تعب و تعذب يا عزيزتي

الظاهر الحاسه سسه مش مزبوظه معاك هل يومين

وعطني ولعه

Sweet Revenge يقول...

لا طبعا مو كل شي بالاحساس بس همن يعطيك ثقة اكبر في قراراتك الي اتخذتها بعد دراسة
الحاسة السادسة يبيلها سيرفس ان شاء الله
قلنا ممنوع التدخين يا بوس

آدم يقول...

مساء الخير ...

هذه التدوينــه أتصورها عتاب لإحساسك منك وهو شيء جميـــل ..

أتصور بأن الإحساس كما هو لم يتغير ولكن الناس هي من تتغير لظروف الحياة في الوقت الحالي ..

ربما يكون هذا الشخص مثل ماذكره لك احساسك شخص جيد ولكن عندما يتغير هذا الشخص هنا الإحساس لا دخل له ربما الحياة قد غيرته من جيد لسيء .

آدم

Sweet Revenge يقول...

يا هلا ويامرحبا بادم نورتنا :)
فعلا يا ادم عتبانه علي احساسي كثير
بس ما فكرت بالموضوع مثل ما انت فكرت فيه ان الناس تتغير ومن جذي الاحساس ما يقدر يوصل هالشي
اسعدني مرورك الطيب ادم وان شاء الله دوم اشوفك منورنا :)

Mishari يقول...

كل بني ادم احساسه يخونه ولكن يقولون كل طراق بتعلومة :)

Sweet Revenge يقول...

هلا فيك مشاري ,يس يا مشاري كثرت الطراقات الواحد مو ملحق p:
شرفتني بحضورك :)

gawga3a يقول...

لووووول .. جني اشتطيت وايد :) والله مافهمت البوست عدل ... لوووول :)

charisma يقول...

لا تطيعيين احساسج وايد شغلى عقلج
انا انصح وانا اخس منج هههههه بس انا بعمر الحين اقدر اقولج العقل الغالب فنصيحتى حكمى عقلج اذا حسيتى ان احساسج بقطج على صخر
:)))

:**

Sweet Revenge يقول...

حبيبتي قواقع انت خذيتيه علي المعني الظاهر ما تنلامين ,منوووووووورة يا عسل :)

Sweet Revenge يقول...

مشغله عقلي بس الاحساس يعطي القرار ختم المرور
لما تكونين مرتاحة واحساسج مطمن تجدمين بدون خوف
واحساسي كان معودني علي هالشي بس قام يخون
الشكوة لله :(
شكلي باخذ برايج واحقرة شوية جود يتعدل ويرد لسابق عهده :)

لين يقول...

ساعات الإحساس يكون نعمه و أحيانا تقولين جان زين ما أحس عشان أرتاح ..

وترى ااوسواس مو شي ;q (فجأه )

Sweet Revenge يقول...

صاجة يا لين ,بس همن ما يهون علي p:

AbWaBy يقول...

ما أدري شقول أنا أول شي حدي اندمجت وقلت وي وعليه منو هذا اللي ما يستاهل وسوه جذي ..بس عقب يوم قريت التوضيح قلت أمممممممم..

الإحساس نعمة من رب العالمين بس أحيانا يصدف ويخيب إحساسنا يمكن اللي جدامنا ما يظهر لنا تصرفاته ونواياه ويبني الإحساس على هالأساس وعقب ننصدم بتصرف اللي ظنيناه طيب والعكس بالعكس ...هذي وجهة نظري

وموفقة وإنشاء الله كل شي يرجع مثل ما كان ..

Sweet Revenge يقول...

يا هلا ويا غلا بابوابيه (صح جذي؟)
احتمال كبير انالشخص الي جدامي مايظهر نواياه بس هذا الي كان يخليني اعتمد علي احساسي اول لان ينبهني من ناس ظاهرهم خير بس اعوذ بالله باطنهم شر
وهالشي الحين كثير يمرون فيه بس الله يهداه قام يخوره معاي ,الله كريم :)
شاكرة مرورج الاول عساه مايكون الاخير

Lavender يقول...

من شفت الحمره ..

قلت >>>> ولــــــــــــين !!! مانخلص ! ههههههههههههههه

بس آخر شي استوعبت انه إحساسج ! p:

حبيبتي الإحساس عمره مايخون بس شوفي شنو اللي مأثر عليه و مخليه يخوووره !

أكيد أكو مؤثرات خارجية أثرت عليه !

Sweet Revenge يقول...

يا هلا والله بهالغمازات الحلوة :)
هههههههه ما ادري حسيت انه الصورة تعبر عن الموضوع,مؤثرات خارجية ؟ يمكن الانشغال بس طول عمري مشغولة شجد عليه الحين
شاكرتلج مرورج العسل وزين والله لقيت احد نفس برجي يا حلوهم والله ربعنا ;)

Barrak يقول...

تكلمي عن شعورك واخذي راحتك



الدنيا توري الخير وتوري الشر

Sweet Revenge يقول...

ان شاء الله ما اقدر اني ما اعبر يغلبني ما اقدر عليه
منورني دوم :)

AK-47 يقول...

خوش كسرة كلنا رحنا بعيد :)

ღ White Rose ღ يقول...

للاسف .. احساسك مرة تعبآن ..


والدليل انو توقعك انو القرآء راح يفهمونك من غير توضيح ما كان في محله لووووووووووول


آمزح معك حبوبة .. صدقيني احساسك يمكن يخون في بعض الاحيان لما نسرف في اتباعه .. لكن يظل مالنا غنآة عنه ..

وهذا ما يعني اننا نهمش الجانب العقلآني في حياتنا بالمرة حبوبة ..

مافيه احلى من التوسط بكل شي .. وصدقيني بترتاحين يا حلوة ..


اتمنى لك صدآقة ابدية وودية مع آحساسك الجميل يا حلوة ..

اسجل اعجأبي بمدنتك .. ولك كل الـــود

بايو ^^

Sweet Revenge يقول...

ما عاش الي يكسر فيك :)بس الله يهداكم بعد طلعتوه واحد خايني
واحد يخوني اكتب بوست ؟
واحد يخوني اروح اذبحة
عيل شلون سويت رفنج p:

LonDonY يقول...

ودي اقولج انه ما يستاهلج.. لوووول

لا خلاص بكمل عن انطباعج عن احاسيسنا اللي ساعات اتقط على صخر

والله ياسويت ركزي بكلامي لانه كلام كبير

انا قمت اشك بظلي انه قاعد يداحرني
ويشوفني شنو اختار ويختار عكسه
*ترا صاحي مافيني شي بس مجرد فكرة*
لول

ساعات لمن احساسي يقولي النتيجة سلبية
المفاجأة تطلع ايجابية
ولمن يقولي ان النتيجة ايجابية
المفاجأة تطلع سلبيه

مادري شقصة الاحساس هذي
هل اهو يضبط حتى سن معين وتالي يبدي يفلتت ويخوره؟ مع ان اللي اعرفه ان مع تقدم الانسان بعمره اتزيد خبرته في الحياة.. احنا قاعد تقل ويانا لوول
لكن مثل ما قلتي الظاهر فيوزات حدسنا قاعدة تضرب شورت
كرهت كلمة حدس منهم..
خلنا على sixth sense ابرك
نرجع لمحور التخبط اللي ماني عارف قصته
المهم انا بعد وياكم
ادري ما قدمت بمشاركتي اي جديد
بس عجبني الموضوع وقلت ادلي بدلو حتى لو فاضي
p;

Sweet Revenge يقول...

مشكورة يا وايت روز ماتقصرين ,اعجبتني سالفة الصداقة مع احساسي هذي ,ومثل ماقلتي خير الامور الوسط .
شاكرة مرورج العطر وان شاء الله ماتكون اخر مرة :)

Sweet Revenge يقول...

يا هلا ويا مرحبا لندني ,اها ماطلعت الا مع هالاجواء اللندنية الحلوة
منور :)
ومن قال تبك فاضي ,لا بالعكس لفت نظري حق شغله ,الاحساس يمكن يتغير لان علي قولتك الخبرة تاثر عليه,لمن نكون اصغر الشعور الاول او خل نقول البراءه وعدم الالمام الكامل بالحياة يخلي الاحساس قوي بس من تدش خبراتنا الحياتية تخربه ,اظنتي هذا تحليل منطقي للموضوع
والله طلعت مو سهل يا لندني ;)
ومنكم نستفيد
شاكرتلك مرورك لندني

خلفية

Leelou Blogs