الأربعاء، 5 نوفمبر 2008

أشمعنه!!!!




صباح الخير ,وحشتوني وايد ,شلونكم مع هالاجواء الرائعة الصراحة مخليه الواحد مرتاح غصبن عليه ,لو يصير شي يعصب ماني قادرة
اعصب لووووول ,الله يتمم علينا نعم الخير والمطر امين .


يا جماعة ماني قادرة اسكت من بدت السالفة وانا اقول تعوذي من ابليس يا سويت مالج شغل بس ماني قادرة لازم اتحجي واعبر, ابليس مو
راضي يهدني في حالي يوزني "اعوذ بالله منك يا شوشو "المهم هالمرة بطيعه وامري لله واتكلم في السياسة


اهي مو سياسة سياسة بس الحدث كبير وغصب عليك لازم تتفاعل معاه .


الانتخابات الامريكية "سويته اول ماتشطح تنطح سيده علي الانتخابات الامريكية"


انا موهامتني الانتخابات كلها لان امريكا دولة مؤسسات وسياستها الخارجية عموما ماتتغير تغير كبير بتغير الرئيس بس


الرئيس اليديد "براك حسين اوباما "اهو الاهم بالنسبة لي .


شخص آمن بالامل ايمان حقيقي ,آمن بالتغير وامن ببلده امريكا ,ماخالطة شك من البداية انه راح يوصل لمنصب
الرئيس
علي كل الشكوك الي كانت تدور حوله "مرة شيوعي ومرة ارهابي ومرة ومرة ",و علي الرغم من اصوله ,وتربيته
وتنشئته .


ماكان في نفسة ذرة من الشك انه انسان ,مواطن ويستحق الفرصة وان قادر علي احداث التغير .


ما انكر اعجابي فيه ثقة ,قوة ,وتعليم عالي تعب علي نفسه وايد مو شويه والاهم قريب من شعبة فاهم معاناتهم, بكل
بساطة اهو واحد فيهم .


براك فاز لان كل امريكي شاف نفسة في براك اوباما ,شاف ان اذا براك وصل انا بعد اقدر اوصل , جدد
آمالهم واحلامهم بالنجاح والوصول للاهداف مهما كانت صعبة ومستحيله .


يقدر او مايقدر علي مهام منصبه اليديد الصراحة ما ادري ,ولو ان شخص مثله اكيد يقدر ,بس الاهم ان وصل وكسر
الحاجز .


حماسي له كان لان يعطي مثال واضح علي قوة الايمان ,قوة الايمان بنفسك ومعتقداتك وقدرتك علي النجاح في اي مجال
مهما كان ,حماسي له لان لما نتكلم عن امكانية الوصول والنجاح ماراح يكون مجرد كلام انشاء لا ,
كا براك اوباما اشمعنه ! ماكو حجة لاي واحد يقول لا صعب أو مستحيل ,اشمعنه براك !!!
ما استعيل براك خذاها خطوة خطوة بس وصــــــــــــــــــــــــــــــل.
امريكا انتخبت "براك حسين اوباما " لان وثق فيها وبالتالي اهي اوثقت فيه, لااكثر ولا اقل .


انت ! قادر تثق بوطنك , باهلك , بنفسك, بقدراتك؟؟؟؟ وبالتالي يبادلونك الثقة وكلنا نفوز


مبروووووووووووووووووووووووووووووووووووووك من قلبي لك يا" بو حسين "قدها والله .



ومثل ماقلت يا بو حسين

'All things are possible'

هناك 18 تعليقًا:

AK-47 يقول...

اوباما لو بالكويت
ما يوصل حارس مرمى
بالكويت اللي بيوصل لازم يتنازل ويغض النظر
:)

Sweet Revenge يقول...

لا مو لازم بس احنا الي خليناه لازم
هذا اهو الفرق :)

esTeKaNa يقول...

عدل كلامج والله
وعجبني طريقه تناولج للموضوع وزوايتج له
كل شي جايز
وماكو شي مستحيل
نقولها بس في تطبيقنا لها الكثير من القصور
!!
انا اليوم مشتطة من صجي ويا اوباما يا حليله صج نقله نوعيه في تاريخ امريكا:)

Sweet Revenge يقول...

يا هلا ويا غلا استكانة منورة والله
انت شقاعدة تقولين انا من قعدت وانا مجابلته صج اليوم يوم تاريخي ,امريكا نتتخب واحد اسمة :براك حسين اوباما " و اسمر
الصراحة شي عجيب بس اذا دل يدل علي رغبتهم للتغير الفعلي ,فتح عصر يديد وزمن يديد .

AL7ESIN يقول...

صاجة والله

انا اليوم رحت شفت فيديو
I HAVE A DREAM

وقعدت افكر بهالحشود والحماس اللي عندهم اللي وصلهم لهاليوم، اشحقه احنا ماعندنا مثلهم
تهقين الفقر حدهم؟

Sweet Revenge يقول...

اذا تقصد بالحشود السود الامريكيين ,العبودية لقرون اهي الي وصلتهم لجذي
حقوقهم المهضومه والتعامل معاهم علي اساس انهم مواطنين من الدرجة الثانية اهو الي وصلهم لهالشي
وايد دول فقيرة بس ماوصلت لهالمرحله
الامريكين الصراحة شعب غريب بس يجبرك علي احترامه انتخبوا براك اوباما وتخلوا عن كل تحيزاتهم وتعصبهم لان امنوا فيه وبقدراته
حياك الله :)

THE BOSS يقول...

يبا اهمه ينظرون لكفأة الشخص
ما عليهم من اسمه ورسمه و شسمه

والبركي صراحه كفو

وعطني ولعه

kuwaitawy يقول...

كلامج عدل يا سويت


يستاهل بو حسين :)

Sweet Revenge يقول...

الصراحة الامريكيين اثبتوا وعي ونضج سياسي مميز ,انتخوا بوحسين بغض النظر عن كل شي لان الاكفأ
تستاهل ولعة بمناسبة الفوز :)

Sweet Revenge يقول...

حياك الله كويتاوي :)

B" يقول...

انا ما اتابع السياسة عادة
لكن اللي صاير يجبرني اتابع
والكلام اللي ذكرتيه وطريقتج في طرح الموضوع خلوني اشوفه من زاوية جديدة
بغض النظر سواء تعدلت الولايات المتحدة ولا ما تعدلت .. اوباما راح يبقى رمز للعزيمة والاصرار والثقة ..
اتخيل نسخة كويتية من اوباما في برامج الاغاني وغيرها .. لكن في السياسة .. الله كريم!

Sweet Revenge يقول...

برامج الاغاني ؟ ,اشمعنة !!
ليش لا
ليش مانكون مثل براك اوباما واحسن منه بعد ماكو شي بعيد علي الله,وحياك الله عندنا

B" يقول...

اقصد برامج الواقع
لانهم يمثلون دولة ويسوون اللي عليهم وهم اشخاص حالهم حالنا وبالاخير نجاح وشهرة واسم
هذا من ناحية المبدأ
سياسيا ما تصير لان كل واحد فيهم يشوف نفسه اول
الله يحييكم

اقصوصه يقول...

صدق

والله انا من شفته هو مرشح نفسه

فكرت بهالكلام

حلوالانسان يقدر يثمن نفسه

يقدر يطلع طاقاته

يعترف بنفسه بشكل صحيح!

موضوع التدوينه حلو :)

Sweet Revenge يقول...

هلا بدر ,مو علشان جذي احنا غير كل واحد يشوف نفسه الاول مو شعبة
براك اوباما شاف شعبه الاول علشان جذي وصل
شاكرة مرورك نورت :)

Sweet Revenge يقول...

مشكورة يا اقصوصة واهم شي ان الواحد يعرف نفسه صح ويسعي للي يستاهله في هالدنيا
منوره ه ه :)

تراب الكويت يقول...

صباح الخير

الممكن والجايز .. واردة
يبيلها متطلبات صعبه تتوفر عند العرب ككل ولو توفرت هناك من سيتصدى لها .. هكذا نحن

زاوية جديدة وجميله لتناول الموضوع

احسنتِ :)

Sweet Revenge يقول...

ودي اشيل صعب ومستحيل ,انا عندي قناعة ان مدام صعب معناها ممكن خل يحطون عقبات احنا نشلها ان شاء الله
مشكورة هلي المرور ,ماتقصرين :)

خلفية

Leelou Blogs