الاثنين، 6 أكتوبر 2008

العيد جاء اهلا به

السلام عليكم ,شلونكم يا اهل المدونات عيدكم مبارك وتقبل الله منا ومنكم صالح الاعمال
بالنسبة لي
اول يوم العيد اهو اهم يوم ويمكن اليوم الوحيد الي احس فيه بالعيد باجي ايامه تمر علي بطريقة عادية مثل
اي يوم ثاني , صلاة العيد ,العيادي وريو ق العيد اهم الي يخلون هاليوم مميز عن غيرة من ايام العيد .
بالنسبة لي كان السنة مميز اكثر :), قعدت مبجر علي غير العادة وطلعت همن مبجر وصلنا مصلى العيد
وقعدنا ننطر الصلاة ,احب فرحة العيد بعيون الاطفال وملابسهم اليديدة والي لفت نظري السنه الحنه ,وايد
بنات متحنين صغار وكبار كانت هذي من عاداتي واناا صغيرة ,يدتي الله يرحمها كانت تحطلي كمية في
ايدي بالليل وتربط ايدي بخرجة علشان تثبت الحنة وماتتفتت ,ظنيت ان الناس نست هالعادة الحلوة بس
الظاهر موضة السنة ;) ودي اتحنا مثلهم ,للحين احنا في مصلي العيد الوقت يمروالمصلين يزيدون شوي شوي بس ما اسمع
التكبيرات وماكو صلاة امممممم شسالفة ,ماكو صلاة؟
طلع المكرفون خربان والرياييل يصلون بدونا !!! نعم!!! انا قاعدة من الصبح علشان صلاه العيد وانتوا
بتصلون بدونا طبعا لحقنا عليهم وخلصت الصلاه ورجعنا البيت.
اول يوم العيد وصلني اتصال الصراحة ماتوقعته ,وصلني من صديقة بعدتها الايام ,حيل عزيزة علي
ومتفقين وايد بس مشاغلها بعدتها كنت اظن ان حبل الوصل انقطع بس اتصلت هنتني بالعيد .
دايما يقولون ان رمضان والعيد فرصة لنبذ الخلافات والاحقاد والتواصل ,بالنسبة لي ما كنت احس هالكلام
ينطبق علي لان الحمد لله مالي عداوات تذكر .
بس سارة مو عدوه ,صديقة ظنيت اني فقدتها من زحمة الايام بس العيد رجعها لي :),كانت مفاجاة سارة من سارة وعسا
كل ايامكم اعياد وافراح .
نشوفكم علي خير

هناك 10 تعليقات:

سيمفونيات أنثى يقول...

كل عام وأنتِ بخير
والله أنا مارحت صلاة العيد بنات عمي ماشجعوني قالوا مانبغى نروح وقعد معاهم
والحنة ماااااا احبها ولا عمري حطيتها بيدي لاصغيرة ولا كبيرة:(
إن شاء الله استانستي بعيدكـ:)

Sweet Revenge يقول...

يا هلا سيمفونيات انثي ,عيدج مبارك وايامج سعيدة
ان شاء الله السنة اليايه تروحين متعة والله جربي راح تستانسين :)

gawga3a يقول...

واي ما احب ريحه الحنه :( مادري اشلون تستحملونها.. عالعموم كل عام ونتي بخير والله يعوده علينا انشاءالله

Sweet Revenge يقول...

ههههههههه قواقع الريحة اي لج عليها بس الصراحة شكلها يالايدي وخاصة بعد اذا نقش شي مو طبيعي
جربي راح تعجبج ;)

mellow يقول...

تصدقين؟
جني آنا إلي كاتبة الموضوع :)

كلماتج بسيطة و معبرة ، رف قلبي يوم قريت "وتربط إيدي بخرجة علشان تثبت الحنة"، تذكرت أيام أول لما أنام و آنا إيدي مربطة ، كنت أحب الحنة تكون سووووووووووووودة علشان ما تروح بسرعة...و آنا بعد شفت صديقتي بالعيد ..صديقة عمر مو شايفتها من 8سنين.

لكن أحلى عيد قضيته بحياتي كان عيد الأضحى أيام الحج..اليهال كاشخين وهالبنيّات الصغيرونات مسوين الزَّوي وحاطين الشرايط ولابسين نفانيف منفوشة ورايحين الحرم..الله يكتب لج حجة عن قريب وشوفي العيد هناك و تذكريني.
عسى الله يعودنا على هالأيام بصحة و عافية و عسى الله يديم السعادة.

ومشكورة

kuwaitawy يقول...

اول يوم العيد وصلني اتصال الصراحة ماتوقعته ,وصلني من صديقة بعدتها الايام ,حيل عزيزة علي
ومتفقين وايد بس مشاغلها بعدتها كنت اظن ان حبل الوصل انقطع بس اتصلت هنتني بالعيد






--------


هذا الشعور جميل جدا


شي جميل ان يتصل عليك شخص وانت ما توقعت اتصاله




--------


يا عسى ايامج كلها افراح انشاءلله

تراب الكويت يقول...

سويتي
عيدج مبارك
ايامج سعيده
احلامج محققه

وحناج روعه ( احب الحنه :$ )

شكرا لمرورج اللطيف
وسعيده جدا اني وصلت لمكانج

مرور اول وان شاء الله ماهو الاخير

موفقه حبوبة :**

Sweet Revenge يقول...

mellow
امين الله يسمع منج
تبين تشوفين العيد شوفيه بعيون اليهال
وفرحتهم فيه
مشكورة ومتقصرين علي المرور شرفتينا :)

Sweet Revenge يقول...

اجمعين يارب ,حياااك الله :)

Sweet Revenge يقول...

اكيد مو الاخير ان شاء الله, فرحني مرورج الغالي
اشوة لقيت احد يساندني في حبي للحنة
طلعت مو بروحي :)

خلفية

Leelou Blogs