الأربعاء، 27 أغسطس 2008

قهوتي



صباح الخير ,شلونكم شخباركم ياربع المدونات


وايد ناس تبدي يومها بفنجان قهوة ,بالنسبة لي ماني من محبين القهوة
ابدي يومي بشاي حليب ,القهوة وقتها عندي
نص النهار لما اكون فعلا محتاجه جرعة كافيين تساعدني علي اليقظة لباقي النهار .


انا ما اطلبها في المكتب من اشتغلت وعامل الكفتيريا الي
عندنا يحطها علي مكتبي الساعة 12 بالضبط الصراحة في بداية شغلي
كنت استغرب بس كنت اشربها ,لان محتاجتها .


قلت لكم ما اميل للقهوة وايد وقررت في فترة ان انقطع عنها ,كان عامل
الكفتيريا ايبها الساعة 12 بس ماكنت اشربها
هالمرة ويشيلها اخر الدوام ,الي ان يوم سالني
انت ماتحبين قهوتي ؟قهوتي فيها شي ؟كان يقولها بتاثر واضح


تضايقت من روحي وايد ,انا ما بلغته بقراري ولا قتله يوم ان قهوته حلوه .


تذكرت احباطي اذا انجزت عمل والمدير خذاه بدون شكرا او بسمة رضا


تذكرت الكلمات الحلوة المشجعة الي اسمعها والي اتذكرها مهما مر عليها من سنين


راح انجز عملي واقوم بواجبي حتي لو ماسمعت هالكلمات او اللفتات الجميلة بس شكثر راح تفرق معاي لو سمعتها


بالنسبة لعامل الكفتيريا هذا شغله و انجازة ,تضايق لرفضي لشغلة بدون ابداء اسباب ؟


شغلات صغيرة ننساها في زحمة الايام ,ابتسامة صغيرة ,سلام ,سؤال عن الاحوال ,شكر ,هدية بدون مناسبة


تذكر سعادتك وانت تحصل علي هالاشياء والابتسامه الكبيرة المرسومة علي ويهك الحين وانت تتذكر


احبابنا اصحابنا اهلنا محتاجين هالشغلات الصغيرة مثل ما احنا محتاجينها راح تفرق معاك ومعاهم وايد


ابشركم كل يوم اشرب قهوتي الساعة 12 ,فرنسية وطبعا سويت :)


نشوفكم علي خير

هناك 29 تعليقًا:

AK-47 يقول...

ابتسامة صغيرة ,سلام ,سؤال عن الاحوال ,شكر ,هدية بدون مناسبة
تسوي فرق فعلا مشكورة

وانا بعد اشرب قهوتي كل يوم بس الساعة11
فرنسية بس وسط :)

بـنـت بـطنـهـا يقول...

صاجه

الكلمات اللي مثل هذي لها تشجيع مو طبيعي .. انا عندي دكتور اذا قال بارك الله بيج (عراقي دكتوري) يااااااي عندي بالدنيا والله ما تشوفين شكثر استانس واتشقق لا قال بارك الله فيج
وعدا عن الكلمات فان الابتسامه بحد ذاتها كافية احيانا وتغني عن اشياء كثيره

بس تعالي انا ليلحين كاسر خاطري العامل ولو انج قمتي تشربين القهوه .. عفية شنو رديتي عليه؟؟؟

Sky Is Falling يقول...

الكلمة الحلوه لها تأثير سحري
وصح مرات الابتسامه تكفي ..وهالشي يعطي دافع انه يشتغل اكثر ويبدع اكثر .. وبحالة العامل يضبط قهوتج عدل ..
احس لمن احد يقولي جذي يروح التعب كله واستانس من قلب ..
(:

عثماني يقول...

ترى بوستج جميل جدا

فكرته واااايد حلوة

وصلتي الهدف بطريقة روعة

عساج على القوة

:)

charisma يقول...

والله صاجه كل انسان يحتاج الابتسامه والتشجيع والكلمه الحلوه لما ينجز عمله وخصوصا الى يأديه بضميييير

انا جذى اذا قدمت شغلى اترقب اى شى يا نقد يا تشجييع بس اضايق اذا خذاه بدون اى تعليق
تلاقينى اوقف اقوله شوفه شرايك !!

بالفعل كلامج مضبوط

وبالنسبه للقهوه انا مدمنه قهوه بجميييييع انواعها
://
قراده


تسلم ايدج على هالبوست الحلو
:*

kuwaitawy يقول...

عجبني بوستج بصراحه :)


القهوة شي اساسي بالنسبة لي انا ومالي وقت محدد

:)

chــاي أخضر يقول...

الشي الحلو بـ كتاباتج .. تتكلمين بـ عفوية وتوصلين فكرة


أما بـ النسبة لـ الكلمة الطيبة والابتسامة .. صدقتي


أحيانا تشتغلين وتتعبين مع علمج وقناعتج انج مو قاعده تشتغلين هـ الشي لـ أحد ولكن التقدير والكلمة الطيبة تبعث في النفس شعور طيـب ودافع معنوي رهيب لـ الاندفاع


مع ان المطلوب شي بسيط >> =)


بـ العافية القهوة ولا تنسين كل يوم تقوليله قهوتك طيبة اليوم ^_^



يقول -صلى الله عليه وسلم-
" أفضل الأعمال أن تدخل على أخيك المؤمن سرورا "

Sweet Revenge يقول...

هلا والله شلونك ak-47اول مرة استوعب امس ان اسمك نوع من الاسلحة ان شاء الله علي عدوانا
شكرا علي الطله ولا تنسي تقول حق الي ايبلك القهوة ,قهوتك حلوة :)

Sweet Revenge يقول...

ههههه بنت بطنهاما تخيلين شكثر تفشلت منه وقلتله ان قهوته حلوة بس انا ماكنت اشربها لان تتعبني وحابة اخفف منها شوي
وبيني وبينج لما قطعتها من تصير الساعة 12 اطق روس وادوخ ورديت لها .
وبارك الله فيج وفي دكتورج "ان شاء الله عطاج A ;)

Sweet Revenge يقول...

عساج دوم مستناسة
ومشكورة لانج كتبت بحروف عربي
الحروف الانجليزيه ضيعني
:)

Sweet Revenge يقول...

يا هلا ويا مرحبا بعثماني
علي فكرة مدونتك كانت من اوائل المدونات الي دخلتها
مشكور وماتقصر شرفتني بمرورك:)

Sweet Revenge يقول...

يا هلا ويا مرحبا بكريزما , والله زين توقفين وتسالين انا ابلع العافية واسكت
بس طريقتج صح علشان الي جدامج يحس شوي

والله يسلمج من كل شر :)

Sweet Revenge يقول...

kuwaitawy
مشكور وماتقصر
نورت :)

Sweet Revenge يقول...

يا صباح النشاط ,شاي اخضر شمقعدج هالحزة "طالع عندي 4 صباحا " (وحدة تتحرش لوووووووول)
الكلمة الطيبة تدوم بقلبج وماتنسي بس احنا نستسهل الانتقاد بحسن او سوء نيه .
لا عامل الكفتيريا كل يوم اشكره بنبرة فيها تقدير.
قام يتوصي فيني وايب لي بسكوت بعد ;)
شاكرة مرورج واسعدتيني

لمى يقول...

صحيح !

أعجبتني مدونتكِ بالمناسبة :)

لين يقول...

أحلى شي لما تسوين هالأشياء و تنوين فيها الأجر من الله راح يرتفع عداد الأجر و عداد المحبه في قلوب الناس لج :)


كلامج 100% صحيح .. أشياء يمكن تكون صغيره لكنها تترك أثر كبير و حلوو في القلب .. في زمن ندر فيه الحب بدون شروط ...

يعطيج العافيه

ليـــــــن

gawga3a يقول...

اي والله الواحد محتاج ان يسمه هالنوع من الكلام .. كلمات صغيره ولكنها كبيره في قلوبنا

بـنـت بـطنـهـا يقول...

زين تسوين رفعتي معنوياته شوي

والدكتور اي الحمدلله عطاني ايه ما قصر لول

Sweet Revenge يقول...

شكرا مي علي المرور وحياج الله :)

Sweet Revenge يقول...

يعافيج لين
صدقت والله ,هذي العدادات اهي الاهم
الحب غير المشروط ما ادري احس صار من المستحيلات الله يعين
مشكورة مرورج الكريم :)

Sweet Revenge يقول...

قواقع في كلمات طيبة سمعتها من سنين وموقادرة انساها متذكرة الزامن والمكان والشخص .
جميله الكلمة الطيبة بلسم تنزل علي النفس
عسي دوم ايامكم جميله :)

Sweet Revenge يقول...

تستاهلين الA ;)

صقر قريش يقول...

شؤون صغيرة لانلقي لها بالا تساوي العالم كل العالم عن أناس آخرين!! كم استصغرنا من عمل رغم ان اثره عظيم والناس في اعتقادهم ان السعادة في الأخذ لكن اكبر السعادة في العطاء وعندما ترى نفسك سببا لسعادة الشخص الذي أمامك فتظفر بسعادة الدنيا وبجزاء الله في الآخرة ان شاء الله.

موضوع جميل ومعاني اجمل بورك قلمكِ وتقبلي مروري الأول إن لم أكن مخطئا:)

Sweet Revenge يقول...

ما عاش من عاش لنفسه
العطاء جميل يفيد صاحبه قبل ان يفيد الاخر.
شاكرة مرورك وكلماتك الطيبه ,واكيد هو المرور الاول وارجو ان لا يكون الاخير :)

charisma يقول...

مبارك عليج الشهر حبيبتى
ومن عواده ان شاءالله
:)

Sweet Revenge يقول...

علينا وعليج تبارك :)

tweety يقول...

مرحبا
مبارك عليج الشهر

اللي خلاني أعلق اهو البوست اللي قبل هذا ( خايفة ) حبيت أقولج لا تخافين إنطلقي بقوة لأن عندج أسلوب متميز وايد حلو ولاتحاتين ولاتخلين خوفج يحط لج عقبات تعيقج

Sweet Revenge يقول...

يا هلا تويتي ,علينا وعليج
مشكورة وماتقصرين وان شاء الله مستمرين
بتشيجيعكم ومساندتكم :)

بـنـت بـطنـهـا يقول...

فاقدينج من غير شر

عيدج مبارك وكل عام وانتي بالف خير يا رب

خلفية

Leelou Blogs