الثلاثاء، 20 أبريل 2010

قلم رصاص لأعلي سعر




السلام عليكم شلونكم مدونين و مدونات عسي كل اموركم تمام الاجواء جميلة وحلوة ان شاء تكونون مستمتعين فيها مثلي .
في عالم الاطفال امور اذا صارت اقدر احصل لها تفسير بس اذا صارت مع الكبار فترفع علامات استفهام كبيرة ؟
اخوي الصغير لما كان في اولي ابتدائي , حصلت عنده قلم صغيييير , بالحجم الي شايفينه بالصوره بدون مبالغة كان صغير حيل ويستنجد يقول قطوني ,المهم شلته علشان ابدلة بقلم ثاني بس اخوي رفض رفض نهائي واصر ان القلم يظل معاه وقال انه هالقلم يخليه يطلع الاول ؟؟؟؟طبعا ما فهمت شيقصد ولما استفسرت اكثر منه قالي :ان الاطفال الصغار في صف اخوي لاحظوا ان اخوي لما يكتب بهالقلم يخلص حل التمارين بسرعة والمدرسة تحط له ثلاث نجوم وكلمة" الاول "علي الدفتر وان الاطفال "الصغار" حاولوا يساومونة علي القلم, الي قاله باعطيك عشر اقلام مقابل هالقلم والي قاله بعطيك فلوس !!!! طبعا اخوي رفض رفض نهائي ان يفرط بقلمه العزيز السبب في تفوقه واحتفظ فيه لما صار بالحجم .
طبعا انا ما اذكر مصير القلم عقبها بس الحمد الله اخوي ظل متفوق بدون القلم العجيب .
اقدر احصل العذر لاخوي والاطفال علي هالتفكير البسيط ,في النهاية كانوا اطفال مايتعدون عمر الست سنوات .
بس الي ما اقدر افهمة ان ناس بعمر الست سنوات مضاف اليها عشرات السنين "اسفة انا مو شاطرة بالحساب مثل اخوي ;)"
يفكرون نفس التفكير ,تفكير طفل عمرة ست سنوات يظن ان القلم سبب نجاحة اونجاح غيره , اشخاص يظنون ان النجاح بتقليد امور سطحية يسوها المتفوق ,يقلدون ملابسه ,اكله شربه او حتي طريقة كلامه بدون اي محاولة لتقليد عمله واجتهاده في العمل او الدراسة .
صحيح ان الشاعر يقول (تشبهوا بالكرام ان التشبة بالكرام فلاح) , بس الشاعر يقصد التشبه بالعمل .
لما البس نفس اللبس واركب نفس السيارة واكل نفس الاكل يخليني ناجحة؟؟؟؟؟؟ ,علي قولة اخوانا المصريين "ماكنش حد غلب"
جان صارت السالفة سهالات وسيارة وبدلة والنجاح بالمخبا .
صحيح المظهر والعلاقات الاجتماعية مهمة وممكن توصل شخص لمكان معين بس ماتشكل غير 20% في معادلة النجاح ال80 % الباقية اهي في العمل ماتتعوض باي شي ثاني مهما كان , في النهاية الشغل والاجتهاد الحقيقي راح يوصل فيك لمكان ارفع واحسن .
ادري ان اول كلمة راح تنقال الواسطة خربت كل شي ,صحيح في ناس توصل بالواسطة بس همن في ناس توصل بالعمل ,ليش ماتكون من الصنف الثاني , ماله داعي اذكر قصص الناجحين تعرفونها اكثر مني "وجد الي عنده قصة خل يقولها لنا نستفيد منها ".
"There is no short cut for successes ”
يا تجتهد وتنجح يا .......
قلم اخوي العجيب معروض لاعلي سعر
اشوفكم علي خير

هناك 10 تعليقات:

مـي يقول...

ياحلوه الله يحفظه ، صج تفكير اليهال عجيب..
ذكرني في بنتي تريقت مرة عسل مع قيمر الصبح ، وقلت لها إنه يذكي ، وراحت المدرسة وتقول يما اليوم صرت شاطرة بالمدرسة أحس إن العسل يذكي ..
ومن يومها تاكل عسل حق كل امتحان ..
بس مرات تقول ما اشتهي يقث.. يما ادعي لي آخذ علامة كاملة بدون ما آكل عسل !!

reemas يقول...

منو قال اللي يوصل بالواسطة و يستخدم الشورت كت هذا انسان ناجح
فعلا لا يوجد شورت كت للنجاح
الناجح الذي يستطيع ان يفرض نفسه في اي مكان و زمان بقوة مجهوده و علمه
اما من يعتمد على الواسطة سيظل متعلقا بها
متى ما ذهبت وقع و لا حد يسمي عليه

شكرا للموضوع سويت
:)

Sweet Revenge يقول...

يا هلا والله مي ,الله يحفظها وتشوفينها من المتفوقين الناجحين وبدون عسل :)

Sweet Revenge يقول...

ريماس يمكن في الطب ماتقدر تستخدم الواسطة لان النتيجة مشاهدة علي المرضى بس في بعض المجالات الثانية مثل مانشوف ينحط صاحب الواسطة في مركز معين وينحط معاه "سنيد" وفي الاغلب يكون من جنسية اسيوية يسوي الشغل
والدنيا ربيع والجو بديع ,منورنا ريماس دايما :)

سلة ميوّة يقول...

مساج الله بالخير
اول شي
اعتب عليج
والعتب بين الحبايب مسموح:)
شدعوه؟؟؟ بوست بالشهر؟؟
ترى سوالفج حلوه
ونبي بعد سوالف..نبي بعد بوستات


أما بعد:)



والله هاليهال عليهم طلعات
انا من هالقلم شفت وايد
وبيني وبينج لاتعلمين احد وانا صغيره كنت احب ابري مادري ليش ولما يوصل القلم هالحجم استاااانس
بس ماكنت اكتب فيه
انا بروحي عسماوية وهالدور بعد اكتب بقلم صغير:) انتحر
المهم على التقليد..اول مره ادري انه في ناس تفكيرهم وصل لي هالمستوى...اممممم..والله مادري شقولج
ودي القى تبرير بس ماكو...
وعلى قولتج ماكو طريج مختصر لهالشي بالذات...



البوست الياي راح يكون عقب يومين؟ صح؟؟؟

صح؟؟ صح؟؟؟ قولي صح عفيه:)



مساج فواكه

www.salatmaiwa.com

Nikon 8 يقول...

وأنا أيضا ممن يعتقدون بأن سر ذكاء إخوانا أهل الشام والفلسطينيين هو أكل الزعتر !
لي يومج عندي هالإعتقاد !
على أكلي له المفروض ماخذه جائزة نوبل !
مسائك فل وورد يا سويت
:)

Sweet Revenge يقول...

يا مسا الفراولة والمانجو الفونسو "انا من قريت سالفتها بمدونة نيكون وانا معجبة بالمنجا "
وكل انواع الميوة يا سلة ماينشبع منها
واما بعد تصدقين عاد عندي محفوظ موضوع من زمااااان ومترددة بس شورج وهداية الله انزلة باذن الله بااااجر الخميس .
اااايه يا سلة انا ماكتب البوست الا وشايفة الموضوع زايد قبل كنت اسمع اليهال بينهم وبين بعضهم يسالون الشاطر شنو تاكل شنو تدرس متي تدرس
بس الحين رياييل وحريم شكبرهم
اذا شافوا وحدة ناجحة في حياتها الزوجية او مع عيالها راحوا قلدوا تسريحتها ولا شروا نفس سيارتها
اي شكو هذا بهذا
صارت ناجحة مع زوجها مجابلته وتداريه
صاروا عيالها شطار تدرسه ومهتم فيهم مو هايته بالعروس والاستقبالات ليل ونهار.
واحد من الرياييل ما خلا شهادة ما خذاها ومن احسن الجامعات ماشاء الله ,ليل نهار يشتغل والله فاتح عليه يهدوون هذا كله ويسالونه وين تحسن راسك!!!!!
الله يهديهم لانفسهم
ما ادري عاد من قايلهم بالشعر
والاصلع شيغبر بعمره p: فاشل لامحاله راحت عليه تحسونه النجاح .
اقول يقولون العسماويين اذكيا يالله خل اشوف شلون بيقلدونج ;)
:**

Sweet Revenge يقول...

يا حياالله نيكون تصدقين عاد كنا ناكل زعتر علي بالنا اهو سبب الذكاء
لا فادنا زعتر ولا زيت
هلا بالطله الحلوة وعسانا ماننحرم منها :)

fatto يقول...

مساء الخير سويت ريفنج اشلونج شخبارج والله لج وحشه انتي قطعتي وانه هم قطعت فتره بس الحمدالله ( نعود دائما ) :)

هالي اتحجين عنهم عقولهم صغيره .. عبالهم المظاهر اهي الي تمشي حياتهم .


يحليله اخوج يذكرني ابسوالف اخوي :)
الله يخليه لكم يارب :)

Sweet Revenge يقول...

يا هلا والله فاتوا شخبارج وان شاء الله كل امورج بخير وصحة
بالضبط علي بالهم المظاهر العلاقات تمشي امورهم وام يحاولون يتعبون علي روحهم شوي بس ما نبي منهم زود .
مشكور فاتو علي المرور ودمت انت ومن تحبين بالف خير :)

خلفية

Leelou Blogs