الخميس، 16 ديسمبر 2010

وللصبر حدود




السلام عليكم :)



شلونكم مدونينا الكرام


في احاديثنا اليومية نسمع كلمات


مثل "دير بالك لا تعطي وايد من نفسك "


"للحب حدود مو كل شي ينعطى"


كلمات تحفزعلي تحديد وتقنين المشاعر والعطاء بشكل عام


من القدر الي نعطيه من عواطفنا و من انفسنا حتي لاقرب الناس لنا



المشاعر لها حد ؟


العطاء له حد ؟



هذا اذا انا الطرف الي يعطي


بس اذا انا او انت الطرف الي ياخذ ارضي


ان صديقتي تعطيني نص قلب ؟


ارضي زميلي يعطي "الا ربع" من مجهودة بالشغل؟


اتقبل ام تحب ولدها بس اذا صار ولد مطيع ومؤدب؟




اذا كان ضروري التقنين والتحديد


شنو المعيار


شلون اقدر اقيس القدرالمناسب من


الحب او الصداقة او الزمالة


بالكيلو مثلا ؟ شنو وحدة القياس الصحيحة ؟


لو كنت انت من الي يحدد ويقنن لاي سبب من الاسباب


شفت نتيجة من مبدا التقنين هذا ؟



موضوع غريب ؟ اكيد.


ليش هالموضوع؟


لان ظل شاغلني مدة ,صحيح ان


واجب الانسان يعطي


ويراقب ربه و ضميره


هذا كلام مفروغ منه


بس من المشاهدات الي حوالينا واضح


ان الي يعرف يوازن او يقنن العطاء


يستفيد اكثر وانا متاكدة ان لكم نفس


المشاهدات ونفس الملاحظة والامثلة كثيرة



المكافاة للتقنين للتحديد بس الكل

يطلب العطاء غير المحدود

والحب الغير مشروط


شلون الناس تطلب شي ويكافؤن عكسه؟

الموظف الشاطر الي يعطي بحدود , المدير يعطيه اكثر علشان يشتغل اكثر

الزوجة اذا ارفعت شعار "عدم التعاون مع الزوج" يعطيها الي تبي مع انه

طلب الزوجة المطيعة في شروطة

طلب الطاعة وكافئ العصيان

مو تناقض؟


انا اسالكم لان ماني عارفة اطبق هالمبدا


شغل نص نص ما اعرف له


عاطفة " كيلو الا ربع " ما اقدر اعطيها

اذا التحديد ضد طبيعتك


شالحل ؟



اشوفكم علي خير






هناك 14 تعليقًا:

رورو الشخبوطه يقول...

امم اقدر اصنف نفسي اني معطاءه بس اذا ماشفت تجاوب من الطرف الاخر يعني تقدير الجهودي سواء بالعمل او الزمالة..

اقنن مجهودي اسوي اللي علي وبس ارضاء لنفسي ولضميري وقبل كل شي ربي ..

يعني مقياس العطاء بلنسبه لي اهو يعتمد ع طرف الاخر وتجاوبه ..

ومشكوره..

Sweet Revenge يقول...

يا هلا والله برورو
"ارضاء لنفسي ولضميري وقبل كل شي ربي .."

هذا اهم شي رورو وانا ما اقول لانشتغل ولا ننطر المقابل من الناس
الهدف الاساسي لازم يكون رضا الله
بس الي يمكن محيرني ان الي يعطي يتاذي مرات من هالعطاء مع المفروض يتم تقديرة شوي
مثل ماقلت في المثال موظف يشتغل بضمير يكدشونه ولا في بعض الموظفين يستغلونه

ماتقصرين رورو نورتينااااااااا :)

aL-NooR . يقول...

اللي ما يعطي يكون غالي عند البعض ..و اذا عطى لو ربع او حتى ثـُمن شي ..ينشاف بمليون شي ..
واللي شايف نفسه يكون اهو الصح ..
اللي البعيد اهو الحبيب ..

هذي نظرة مجتمعنا ..
اللي يعطي كل اللي عنده بدون مقابل
يسمونه طيب و منقص عليه ..

فعندي قاعدة
اعطي بدون حدود حق اللي يستاهل و يبين بعينه .. و ما اعطي اي شي حق احد ما يستاهل ..لا بكل بساطة ما ينعطه ويه ..

Sweet Revenge يقول...

ياهلا والله بالنور
اي يالنور قلتيها اي مايعطي "غالي"
وهذا شي يحيرني دايما
انا ممكن اتعامل مع الكل بس اكيد الي يعزني ويحبني احبه واعز
بس الي لا يعزج ولا يحبج وتالي احطه علي الراس هذا الي ماني قادرة افهمها للحين
يا حلو هالطلة والله ماننحرمشش :)

عثماني يقول...

سؤالج بمحله اخيتي

من وجهة نظري .. ماكو حدود

اصلا شلون نحط حدود لمشاعرنا !!؟

عن نفسي .. اكون مثل ما ابي بعواطفي تجاه الغير .. ايا كان هذا الغير

ما احط اعتبار كبير لتصرفاتهم تجاهي ... لكن احط اعتبار لتصرفاتي جدام نفسي

فاهمتني ؟؟

:)

غير معرف يقول...

خلك على طبيعتك
ولا يتعب نفسه بلبس ثوب مو ثوبه

Sweet Revenge يقول...

يا هلا ويا مرحبا زارتنا البركة عثماني :)

فهمتك عثماني بس وايد صعب ,الله يعين

دايما تيب الزبدة ,لاعدمناك

Sweet Revenge يقول...

ياهلا والله اخوي شسوي مرات منبطة الجبد الواحد يبي يفضفض ويتحلطم شوي
عزيز وغالي وحياك الله :)

عثماني يقول...

تسلمين اخيتي ..

بارك الله فيج

حسستيني اني شايب .. مادري ليش !!؟

:)

الجودي يقول...

ممممم

اتفق مع الأخ عثماني و الأخ تحلطم في رأيهم و حابة أزيد نقطه بسيطه المشاعر عمرها ما تقنن لكن العطاء ممكن يقنن

شوفي حبوبه الي قبل قالوا الايد مغرافة القلب القصد إن على كثر ما تعطين تحبين الشخص إلي تعطينه لكن هالمثل خاطئ يعني ما تقدرين تعطين بدون تقنين للمراهق أو الطفل ...

في فصل بين المشاعر و العطاء المادي

و في جزئية خاصه بالمشاعر واعتقد مرتبطه بالدين يعني المفروض يكون عندنا إيمان إن كل من عليها فان ويبقى وجه ربك ذو الجلال و الإكرام
في حالي الإيمان التام ماراح انتعلق بأحد و لا حبنا لأي أحد يصل لحد الشغف
علشان ما يكون الفقد قاسي ...

يمكن هذا القصد من لا تيين كلج ولا تعطين كل الحب و كل العواطف ...
لكن لا اتحبين لمجرد النكايه مممم ما أظن أو أنا ما أحبها ..

وحيد في المنزل يقول...

مساء الخير اختي
اتمنى تشرفيني في مدونتي الجديده
شكرا

Sweet Revenge يقول...

توك بعز شبابك عثماني :)

Sweet Revenge يقول...

يا هلا والله بالجودي

معاج حق الجودي , نقطة مهمة الي قلتيها بخصوص الشغف والتعلق
ذكرة مهمه علشان يكون حب الله هو الاعظم

مشكورة جودي تسلم الايادي :)

Sweet Revenge يقول...

وحيد في المنزل شرفتنا ونورتنا
شاكرتلك دعوتك الكريمة
وحياك الله بينا في عالم التدوين

خلفية

Leelou Blogs