السلام عليكم مدونين مدونات شلونكم وشخباركم
وساحة المدونات فاضية الا من القليل
واغلب المدونين اتجهوا للفيس بوك والتويتر
التويتر وترني الصراحة
مالك الحق الا بكلمة ورد غطاها ما يعطيك فرصة تعبر اكثر
واغلب التويتات سلامات
اما الفيس بوك
قاعدة احاول اتاقلم معاه "احاول لا وعود ;)"
الي لفت نظري فيه الصور
صور كثيرة
وكلها جميلة
وتذكرت مقولة تقول
"All photographs are accurate. None of them is the truth."
- Richard Avedon
"كل الصور دقيقة ولكنها ليست الحقيقة"
من اجمل اوقاتي الوقت الي اقضيه اتصفح صور قديمة
البومات الصور الي مايخلي منها بيت
النشاط المشترك في كل الزيارات بين كل البيوت
علي الاقل في الماضي
اختلفت الوسائل الحين بس الفكرة وحدة
عرض صور حياتنا للناس
سواء كان في البوم للاهل والاصدقاء
او في حسابك الخاص في الفيس بوك
او غيره
صور التخرج, النجاح ,الزواج وغيره من الصور
الي تاكد علي سعادتنا وحياتنا الجميلة
بس هل الصور تعكس كل الحقيقة ؟
توضح الحقيقة الكاملة لحياتنا ؟
ما اذكر شفت صورة
ماتم او عزا مثلا في البومات الصور
ولا حياتنا صارت خالية من كل حزن والم؟
هل الحاجه لتقبل الناس لنا تسمح لنا باخفاء الحقيقة الكاملة عنهم؟
لو كنا اصدقاء حقيقيين او احباب حقيقيين هل كانت هالصور راح تنعرض لنا ؟
ولا كنا راح نسمع الحقيقة من افواه اصحابها بدون فوتوشوب
هل كانت هالصور راح تنعرض لنا لو كنا نتقبل
احبابنا بدون شروط الكمال والجمال
الغلطة غلطة منو؟
غلطتهم لانهم غير كاملين ولاغلطتنا لان مانتقبل الا
"الصور المعدلة"
قولولي تقدرون تتحملون هالحقيقة ؟
اشوفكم علي خير
هناك 19 تعليقًا:
المدونين و المدونات خلصوا كل ما عندهم
خلااااااص .. كل شيء وله امد يتنهى فيه هههههههه
أما التويتر و الفيس بوك فأنا لا أحبهما ابدا ابدا ابدا .. مجرد عرض صور و اخبار و نميمه ... ممممم
أما حقيقة أظهار ماهو معيار ...!!!
أنا باحاول أعمل سجع خخخخخخ
فهو صحيح و انا اوافقك عليه ماائه بالمائه و نمارسه فى حياتنا ..
فترانى انا وزجتى مثلاً ( أنا مو متزوج ) نكون مسويين هوشه للسما ولكن اما الناس نضحك و نتجمل و نتقزلك ..احم احم
أفضل شي فى الموضوع تلك الوريقات الوردية اللتى تتساقط من مدونتك فى اتجاة الأسفل طبقاً للجاذبية هههههههه
حقيقة استمتعت بها جدا و انا أقرأ ..
كنت هنا
أؤجو أن لا أكون ثقيل الظل
:)
أكون صادقه معاج يمكن قليله جداهي الصور المعدلة بالفوتوشوب الي احتفظ فيها .. و كذالك هي الصداقات لا أقبل بالصداقات المعدلة أحب كل شي على طبيعته وأنا لي حرية الإختيار يا أقبل يا أرفض بالتالي كل من له شخصييته ..
مممم فاجئتيني لما قلتي ليش ماعندنا صور لحالات العزا تذكرت إني أملك صور مرة بعزا ولد عمي صورنا ولا تسألين اشلون الصورة كانت للأمهات لكبار وكانت فعلا غريبه كل ما اشوفها استغرب اشلون صورنا و اقول سبحان ربي إلي ماسح على قلبهم و يمكن بسبب قوة إيمانهم كانوا تقريبا جدات الولد إيمانهم كان وايد قوي و يقولون راح لربه مالنا اعتراض على وفاته ..
المهم
الصور تبقى الشي الجميل المتبقي لنا بعد رحيل بعض من اصحابها أو انشغالهم ..
و بالفعل هي سمة مشتركه في كل ازوارة
:)
سوري وايد تحجيت
ياهلا بالبوستات الحلوة الجميلة
وانا مثلج
ماداني التوتر
ومن اسمه
توتر :)
يوتر ويضيق الخلق
انا ترحيبي وتهليلي وبوساتي يبيلهم 140 حرف!!!! شسوي يعني اذا انا قرقة :)
مساج الله بالخير
حبيبتي لاز اسويلج يوم باربكيو...
اقولج قصة الباربيكيو
كل جمعه بالليل...اعزم قريباتي...وكل مره قروب
واطلع لهم جنطه ترولي صغيره...
وهاتك يافضااايح :)
هههه عندي صور حق بنات عمي واهما 3 سنين
مع اني اصغر منهم بفوق ال 5 سنين...بس سلمج الله عندي هواية تجميع الذكريات واذكر بترميم بيت جدتي قطو صور بالهبل..وطبعا انا خذيتهم وحشيتهم عندي....
ههه الحين يورورنهم عيالهم...وعندي صور لي ولبنات عمي وعماتي اللي من عمري على جميع المراحل من اللفه والمهاد لي اليوم...طبعا اللي ضيق خلقي الكامرات الدجتال!!!
خربت علي..والا انا لي 2007 متمسكة بالكامره ام فلاش واصور فيها واروح المصور احمض الصور...بس الحين التكنلوجيا خربتني شوي...
من جذي اقولج تعالي يوم اسويلج باربكيو..واونسج بالصور هههههه
وعلى الحزن..يمكن لو كنا اجانب نقدر انصور بالحزن....بس احزانه احنا كعزا ماعتقد انه نقدر انصورها لانه مشاعر الفقد مؤلمة اكثر من اللازم من انه نحتفظ بذكرياتها...
بس...
واقول بس:) لأنه عندي صور حق المصايب...
اختي عقب الحادث وراسها ملفوف:)
عمتي واهي داشه غرفة العمليات...
اختي واهي تولد...عمتي الثانيه واهي كتعرجبه وطايحعه بنص الصاله
ههههه يعني ....
ها باربكيو:)؟؟؟؟
مساج الله بالورد
واعذريني عالقرقه :**
شكرا قوس قزح سعدت بمرورك
ووريقات الورد الاحمر من الموقع
http://blogamation.com/categories/valentines-day/169-raining-petals.html
عليك بالعافية
يا هلا بالجودي مكااااانج سولفي كثر ماتبين , احب سوالفكم :)
صاجة الحقيقة تعطينا فرصة الاختيار
وهذا من حقنا اما صور الحزن فانا حطيت صور العزا مثال
لان الصور ماتعكس كل شي يمر بحياتنا
والامهات الكبار اعرفوا حقيقة الحياة وقلوبهم مشبعة بايمان ماينهز بالمصائب
الله يرحم ولد عمج ويجعل مثواه الجنه
مشكورة جودي علي مرورج دايما منورتني :*
يا هلا والله بالغائب الحاضر غبتي شوي
بس حاضرة دايما في البال وعلي الخاطر
ما فطنت علي سوالف التصوير الا عقب ماطلعت كمرات التلفون ولا قبل ما افكر اصور كنت اتعيز عن التحميض
بس انت سبحان الله العكس
كنت اتمني تصير عندي صور لطفولتي عندي بس شوية ,يا حلو الاجانب من ينولد الياهل طايحين له تصوير يوثقون تاريخة كله
امممم باربكيوووو موافقة بس اول وحدة نستعرض صورها انت نبي نشوف المستخبي
وسلسلة الفضايح في عالم سلة ميوة
:)
هههه
ترا فضايحي وايده ولا سن المراهقة من 13 لي 16 يابووووي...ماصدق انه هذي انا هههههه
يبيلي انا بروحي جلستين ثلاث...
احنا بعد بلاوينا انه امي كانت اتصورنا فيديو....تعالي شوفي الفضايح والحركات
عندي اختي كانت اتسوي نفسها مذيعه فرنسيه...لما امي اتصور..طبعا على ايام قبل اللي الكامرا كبر الهوفر هههه و الشريك الكبير اللي يتصور فيه اهو نفسه اللي يدش الفيديو..مأساة...اختي ترطن بلغه غريبه يعني فرنسي...لما تسمعيناه تفطسين لأنها جنه فاره تخربج جوجو جيجيجي..اقولها والله حتى الياباني مو جذي مادري شهاللغه...
ان شالله مع عيالج لا طوفين اي لحظه و وثقي البرامج والاحداث لانه ترا اداة ابتزاز ولا اروع انا اهدد خواتي تطلعون معاي والا الصورة الفلانيه توصل حق رياييلكم من باجر.....وعاد ماقولج شيصير عقبها:)
يامسى المطر والشوق:**
الصور تعبر عن كل شي
ومرات وايد ماله داعي تقولين اى شي
فقط رفعي صوره
انا موجوده بكل مكان خخ..
الفيس بوك للتطمش والصالونات والسبا..
توتير مسجله من زمان بس ماحبيته يدوخ :\
والبلوق هو اللي افضله :)
:$ سامحوني علي التاخير
حبيبتي سلة الله يسمع منج ويرزقني الذرية الصالحة واقلبها ستديو تصوير وسنما
منورتنا دايما يا عسل
كركر معاج حق الصينيية يقولون صورة تغني عن الف كلمة
شاكرة مرورج الطيب :)
التويتر من ناحية ان يدوخ فهو جد يدوخ بس تكنلوجيا والكل وراها مايندرا شنو يطلع عقب بعد
البلوق حبيب الشعب
منورتنا رورو :)
فعلاً بالمختصر
الصورة
تخفي خلفها قصة أو رواية
أو حتى موقف وذكرى
وكل تلك الوقائع
تخفي معها شيئاً أكبر
ألا وهو المشاعر المرافقة لها
ونحن من خلال استناطقنا للصورة نجلب لأنفسنا خيالاً يزيح عنا كل التعب
شكراً أخ/أخت
انا اخالفج الراي صحيح انه الصورة وجه واحد من وجوهنا العديدة ، صحيح ما تعرض كل الواقع بس اهي وسيلة عشان نخلد الذكريات الحلوة و وسيلة عشان نذكر الاحبة اللي كانو موجودين ويانا يوم من الايام و فقدناهم و كل مانشوف صورهم نتذكرهم و نتذكر لحظاتنا الحلوة معاهم .
--------------
و لا تنسين ان الصورة ترينا اجمل ما في البشر ، انها الابتسامة
يعطيج العافية عالموضوع
حياك الله ستيف وشاكرتلك مرورك وتشريفك لي
اختك سويت رفنج :)
:) يا هلا ويا مرحبا احمد طولت علينا
معاك حق الصور وسيلة مهمة لحفظ لحظات مهمة بحياتنا , وانا اعتراضي كان علي ان مرات في ناس يستخدمونها علي اساس انها حياتهم بدون رؤية الجانب الاخر منها
ولكم باك دكتور ولاتقاطع عاد :)
اشتقت الى هنا
:**
انتي لي صورة راقية
تذكرنا بالشي الجميل
التقاطنا للصور عبارة عن تجسيد لحظة
تشبه الموقف لكن فقط بالشكل دون الاحساس و الرائحة الطعم و مصداقية اللون ايا كانت دقته ...
اذا بتسوون
باربكيو
يويلكم ان ما
عزمتوني هههههه
يا هلا بالنور كله ياحلوج وياحلو هالطله الغالية ,فعلا الصور تسجيل لحظة ومهما كانت ماتعكس كل الحقيقة
لووووووووووول افا عليج انت اول وحدة احنا نقدر :)
Thaaanks :)
http://www.un4web.com
إرسال تعليق