الأحد، 17 مايو 2009

متعة الانتقام





السلام عليكم شلونكم مدونين شخباركم بما ان الانتخابات انتهت مبروك للفايزين

والله يوفقهم وهارد لك لغير الفايزين وخيرها في غيرها.


في شغله كان لازم اتكلم عنها من زمان ونسيتها الصراحة, اسمي ههههههههه سويت رفنج
الانتقام اللذيذ لاتسالوني شلون عرفتي بس احس في ناس كاشه مني والسبب هالاسم
بس شسوي انا فعلا احب الانتقام :)




****
منو ما يحبه لاحد يجادلني ويقول ما احبه لا تحبونه ونص بعد


بس الفرق الي بيني وبينكم اني اتفاخر فيه
من اجمل واشهي والللللذ متع الحياه ........ الانتقام
ماكو اجمل من هالشعور شعور الرضي والراحة
شعورك لما تنفذ انتقامك
اخطط له
وادبر بهدووووووء وسرية
ولما يكون الوقت المناسب انفذ انتقامي بدون رحمه و بدون ندم
لا لا لا لا محد راح يقدر يقنعني ان خطا او عبث
كلكم نفذتوا انتقام معين في مكان معين بس الفرق الي بيني وبينكم


اني اعلنه ما اخشة او انحرج منه
وبعد ما انفذ احتفل مع اهلي واحبابي
احتفل وانا اشوف الخسارة والهزيمة في عيون اعدائي
مو بس جذي راح ازيد واقول انا ما اقدر ولا احترم الانسا ن الي مايسعي للانتقام
اشوفة انسان ضعيف ,جبان ,خالي من اي اعتزاز او ثقة في النفس.




****



بس قبل لا اسمع الردود ممكن اقولكم قصتي وليش انا اجذي وفخوره بكوني سويت رفنج
لما كنت في المدرسة كنت حابه اني اطلع من الاوائل تغير يعني عن الكسل في المدرسة


اجتهدت ودرست وفعلا صرت من الاوائل .


كنت جدا سعيدة قدرت اسوي شي كنت ابيه واجتهت له


التفت حولي وشفت نظرات غريبة وهمسات اغرب


تقولي شلون؟شلون انت تكونين من المتفوقين


شلون" سويت رفنج" الي مالها حس والي ما كانت من المتميزين
تتفوق وتصير من الاوائل !!!!!! كان استنكار غريب وفي غير محله
اول مرة كنت احس بمعني الظلم من اشخاص اعتبرتهم اصدقاء وزملاء
استنكروا علي حق الطبيعي في الاجتهاد والمثابرة ومحاولة التميز
احكموا علي من خلال شكلي مو عقلي


ليش ماقدروا يميزون انها حاجة لكل انسان ان يكون له مكان تحت الشمس


انجاز يكتبه باسمة حتي لوكان بسيط


حق من حقوق انسانيته
تضايقت وزعلت واستنكرت عليهم سلوكهم ونواياهم
ومن ذاك اليوم جهزت القائمة _قائمة انتقامي_
"My hit list "
قائمتي الي راح احط فيها اي شخص يستنكر علي حقي الطبيعي


في الوجود في اني اكون انسان منجز وله بصمة في حياته


ورد الصاع صاعين .





بـــــــــــــــــــــــــــــــــــــــــــــــــــــــــــــــــــــــــــــــــــــــــــــس


واجهتني مشكلة شلون اقدر انفذ انتقامي من عناصر القائمة بدون


ما ذرف نقطة دم واحتفظ بصورتي الطيبة في عيوني الناس
وانا ما املك اي عناصر للقوة البدنية وبــنيــتي


ماتساعدني حتي علي طفل بو عشر :(


ووصلت للحل
للحل العملي
حل الايجابي
حل الحاسم
وحل انيق "ذرب يعني"
وبدون نقطة دم وحدة

لقيت الحل في المقولة الي تقول : "النجاح اهو افضل وسائل الانتقام "



“Success Is The Best Revenge “


اهو الأنتقام الايجابي
الانتقام الــــــــهادي
الانتقام الفعال والاكيد



اهو الرد لاي شخص يقولك ماتقدر ,صعب عليك اومستحيل


ببساطة انجح هذا ردك الاكيد الي لا احد يقدر ينكره او ياخذه
اهو الرد لكل من يحط عراقيل جدامك ويحبطك عن عمد او جهل انجح ورد عليه
النجاح الي تتعب عليه وتجتهد له وتسمتع فيه اهو الرد اهو
انتقامك اللذيذ



Just go out there and take your sweet revenge and remember "


."no one can defeat us unless first we defeat our selfes






P.S
"هذي كانت خطبة كتبتها ودخلت فيها مسابقة للخطابة باللغة الانجليزيةب ال2007"
;) Do U think I did well
?




نشوفكم علي خير

هناك 37 تعليقًا:

Bloggerista يقول...

انتقامج مو مضر كلش بالعكس, فعلا النجاح أحسن انتقام

can't argue with that :)

fatto يقول...

خوووش خطبه :)

اول شي خرعتيني .. قلت مومعقوله انتي شريره .. اثاري كل الحكم فيج وعقلج كبير :)


الي النجاح دائما :)

:: بـوح الصمـت :: يقول...

صارلي فترة فاقدتج وأقول شفيها طولت الغيبات :) !

لكنج صج يبتي الغنايم :) ..


أروع إنتقااام :*
فعلاً أنا جذي إذا واحد حبطني وقالي ما تقدرين ليش تدرسين جذي ولا ليش داشة هالتخصص وإنتي مو قده ولاّ ليش تتحملين هالمسوؤلية وإنتي ما تقدرين أعاند وأنتقم لنفسي منه وأبذل قصارى جهدي وأحقق وأنجح عشان يعرف إني أقدر :)

كلشي ولا نفسي :)


موفقة حبيبتي .. دام الإنتقام جذي يا حلاته .. إنتقمي منهم لنفسج ليييين تقولين بس بالنهاية إنتي المستفيدة واهما اللي يحترون ;q

mellow يقول...

عائدة بقوة الإخت لا و بتنتقم بعد :**

ياية مستعيلة بس قلت بسيِّر عليج

خوش مقولة سويتي كونفوشيوس منتي هينة آنا أقول هالبنت فيلسوفة :))
ما شاء الله عليج

بالفعل .. الواحد مهما كان هادي ومسالم ما ينكر إن في يوم من إنتقم لكرامته و عزة نفسه و مو إلا بطرق شنيعة و إحراج و تربط عصاعص ...بس إنه يسوي شي علشان يقول حق العالم
HEY...I`m strong
على فكرة ... الإنتقام من هالنوع هوايتي المفضلة ;q ما ألومج لا سميتيه لذيذ لأنه بالفعل جذي

a7mad Nabeel يقول...

السلام عليكم
شلونج اختي sweet revenge؟
ـــــــــــ
الانتقام على طريقة معظم البشر لن و لم يحقق اي نصر للمنتقمين ، بل هو يساوينا بهؤلاء الذين أساؤوا
من أجمل ما قرأت في موضوع الانتقام هو مقولة لي شيبي : " اذا أردت أن تعيش سعيدا لفترة وجيزة انتقم ، و اذا اردت السعادة الدائمة ، سامح الآخرين "
كلنا جربنا هالشي
الناجح دائما ما يصيبه الانتقاد ربما هي ضريبة موجودة على الناجحين ان يدفعوها
أوافقج الرأي تماما لازم الناجح يسكت الابواق المهاجمة بتحقيق المزيد من النجاحات
و لكن لابأس من أن نسامحهم فمن منا كامل ؟
ــــــــــــــــــــــــــــــ
u did very well
ماشالله
بوستاتج من حلو الى أحلى
الحين عرفت سبب الاسم بس بقى اعرف شنو معنى الصورة P:

Sweet Revenge يقول...

يا هلا والله باصحاب المراكز الاولي
شلونج بلوجرسته
لا انا مو في نيتي انتقم من احد بالمعني المتعارف عليه بس اهي طريقة لتوصيل المعني
منوره بلوجرست :)

Sweet Revenge يقول...

فاتو: هلا والله "عاد انا ماني عارفة اي من ال7 انت بس حيااااااااااااااااج :)
اي في الاول تحسين شريره الاشرار وتالي يبين المعني علشان اشدهم معاي ومايملون من خطبتي
اجمعين يارب :)

Sweet Revenge يقول...

بوحه :بس خلاص بعد هذا اسمج الحركي الحين
شفتي شلون غنايم من الحجم الثقيل
للاسف عندنا المحبطين وايد في منهم عن جهل مو فاهم ومنهم حسد والعياذ بالله
وشفت ان احسن وسيلة ارد عليها فيها اهي اني انجح واسكتهم بطريقة عمليه.
طبعا الا نفسج حبيها واحترميها لاقصي الحدود زدافعي عنها بعد من لها غيرج :)
مشرفتنا ومنورتنا يا بوحة والله

Sweet Revenge يقول...

ميلوي :ضحكتيني والله علي سالفة كونفوشيوس :) طلعتيني فيلسوفة مرة وحدة
تجارب الحياه تعلمنا امور يمكن يكون فيها شوي حكمة.
يبتيها رايت انا نوعي مسالمة وهادية فبعض الناس يظنون اني صيدة سهلة بس علي مين ;)انا سويت والاجر علي الله لووووووووووول قلبت ريا وسكينة
طلع لنا هوايات مشتركة بعد ميلوي
وماكو احلي من جذي هواية .

Sweet Revenge يقول...

احمد نبيل :شلونك يا احمد عساك بخير
:)
تعمد اني اذكر انها كانت خطبة لان من خلال الخطبة استخدم صوتي تعابير وجهي ولغة الجسد او الي يسمونة ال"body language "
لتوصيل كثير من المعاني الي ماتوصلها الكلمة بروحها
لوكنت شفت الخطبة يبن ان انا ماخذه عملية الانتقام بطريقة مرحة بعيدة عن اي معني للانتقام الحقيقي
انا ما اكره هالناس وحتي لما احقق نجاح او "اخذ انتقامي" انجح علشان نفسي مو علشانهم وهمن يكون رد علي الي قالي ماتقدرين صعب او مستحيل
رد عملي علي الي يحاول يحط عراقيل جدامي ومثل منت عارف اي شخص يحاول يبني يحصل هالعراقيل
النجاح اهو ردي عليهم
كثير من الناس اذا واجهته مشكله يغرق في رثاء الذات والشكوي ومحاولة الرد بالكلام
بس كل هذا ماله قيمة بدون انجاز
حبيت اقولهم انجح وهذا اهو الرد الحقيقي الي ينحسب لك
معاك التسامح افضل بس بعد ما اخذ "انتقامي" ;)
الحمد لله اعجبتكم وفي المسابقة فزت في المستوي الاول والمستوي الثاني "كانت تصفيات "بس ما قدرت اتاهل للمستوي الاخير
الي فاز كان اخ عزيز من البحرين وماشا ءالله عليه مبدع وطلع من الخمس الاوائل علي مستوي العالم في مسابقة تسابق فيها اكثر من 120 الف متسابق.
الصورة كانتصدفة حطيت اسم سويت رفنج وطلعتلي هالصورة وحسيت فيها مني فالغلب علي الهدوء والسكينه محد يتوقع اني يكون في وجه ثاني لي اسمة سويت رفنج :)
شاكرة مرورك وتشجيعك منورنا :)

kuwaitawy يقول...

success is the best revenge



اعتبر هالجمله حكمة ومنهج بالحياة

Sweet Revenge يقول...

كويتاوي :هلا والله اهي كذلك بالنسبة لي
ما احب ادش في جدال عن الي اقدر اسويه والي ما اقدر اسوه ارد بالفعل افضل وسيلة بالنسبة لي وللحين معطيتني نتايج طيبة

darkness يقول...

@@

تدرين اول شي خفت منج؟؟

هههههههههههه

خوش انتقاااام

انا اقول لج تمي منتقمه

:)

Sweet Revenge يقول...

شسوي انتقامي لذيذ يشجع علي الاستمرار :) منورتنا داركنس

lawyer يقول...

علامي انا ما كشيت من الاسم و حده يازلي هههههههههههههه

تراب الكويت يقول...

زيديهم انتقاما
دام هذا انتقامج :))

تفكير ايجابي سليم 100%

موفقه حبوبه :)

Sweet Revenge يقول...

يا هلا ويا مرحبا لوير :شوفي المحاميين غير يحبون الاكشن والحركة من جذي الظاهر اعجبج الاسم
منوره منوره مكانج لويرنا والاسم حلالج يبا ما يغلا عليج :)

Sweet Revenge يقول...

تراب الكويت :شورج وهداية الله (;

وانت بعد لاتقصرين اخذي انتقامج من كل شخص يحالو يحبطج وياخذ مجهودج

تسلمين علي المرور تراب ماتقصرين :)

Barrak يقول...

ياليت كل الناس تنتقم مثلج


ياليت

Manal يقول...

والله كلام خطير في البداية
لكنه عقلاني في النهاية
:)

انا عندي حكمة

امش عدل يحتار عدوك فيك

اتوقع نوع من الانتقام

وتترك الحيرة بقلب الي يبغضونك

وتتركك سعيد ومرتاح

:)

دمتي بالف خير

Sweet Revenge يقول...

اي والله ياليت يا براك
بس طبعاانت خذيت انتقامك وخلصت
صح
منور براك :)

Sweet Revenge يقول...

منول : والله حتي لو مشيتي عدل مايخلونج
طالعين طلعه الي يمشي عدل متكبر ,الله كريم
مدونتج ومكانج حياااااااج :)

charisma يقول...

هههههههه خوش انتقام
والله استفدت من هالبوست :))

بالبدايه خفت عليييج هههههههه بالنهايه سعيده لج

انشاءالله دوم بنجاح
:)

mellow يقول...

سويتيييييييييييييي

حرام عليج إش هالسايت إلي دازتلي إياه؟
إخنقتني العبرة و آنا أشوفه :"""(

يعني مفكرة هالأيام بخفف شوي ورانا عروس ...ياني إحباط:(

صبا يقول...

هالنوع من الانتقام نشجعه ونثني عليه

النجاح عدوه الفشل وافضل طريقه لمحاربته هو بذل المجهود لنتائج سليمه.. وخووووش انتقاااام وقلعته الفشل خل يتحمل ردة فعل وانتقام سويت


مو هينه الله يوفقج يارب

:**

Sweet Revenge يقول...

ياهـــــلا ويا مرحبـــا يا هلا بكرموزه الاموره الحمد لله علي السلامة
اشوة انتقامي ايجابي ما ابي اعور احد ;) بس حلو انتقامي شسوي
اجمعين حبيبتي ودوم ان شاء الله ناجحة ومتالقة :)

Sweet Revenge يقول...

ااااايه يا ميلوي شفتي شلون عجيب عجيب بس للحين ماوصل للكويت سمعت في ناس بتاخذ وكالته وتيبه الكويت
ذا ك الوقت عاد الحجي
يبا مدام وراج عرس شدي حيلج وانسي الحلو واهلا بالرجيم :)

Sweet Revenge يقول...

يا هلا صبا خلاص خليج منتقمة مثلي انتقمي ونجحي واكيد انت ناجحة علطول بعد مايبيله :)

Amani يقول...

من صجج الانتقام لذه الحياه ...
ولكن الشطاره ولذه الانتقام لما تكون بصمت ومن تحت لي تحت يعني سويتي اللي تبينه من غير لا احد يدري انه انتي السبب وعاااااد تفرجي من بعيد واستانسي بالانتقام دبلين

Sweet Revenge يقول...

لااااا هذا الانتقام السلبي
انا انتقامي ايجابي لان مافيه اذيه لاحد
الي يحاول يحبطني انجح واثبتله بالفعل مو بالكلام اني اقدر اوصل حق الي ابيه وهمن بهدوووء وبدون مشاكل
جربيه صدقيني احلي من الانتقام العادي :)

غير معرف يقول...

النجاح ليس كل شيء .. فالأعداء يحاولون قتلك ليس لأنك ناجح .. بل ربما لأنك سعيد .. واثق من نفسك بغارون من خصلة من خصال شخصيتك غير موجودة فيهم .. الشرف مثلا .. حينما تكون فتاة قمة الشرف والجمال والاخلاق .. سيقتلونها بشتى الطرق .. يسرقون شرفها .. كرامتها .. كبريائها .. في كل مكان تذهب اليه الى ان يقضوا عليها وتموت وهي حية ..

كيف تدافعين عن نفسك في هذه الحال ؟

فهو اصعب من الغيرة من النجاح لأنه ليس شيء مادي بل يغارون منك لأشياء حسية وروحية .. وهي لا تعوض .. ولن يبتعدوا عنكي الى ان يتركوك جثة هامدة .. الى ان يقضوا على الروح الموجودة فيك

Sweet Revenge يقول...

صحيح اخوي صحيح ما ذكرت فمثل ما قال الشاعر "كل العداوات قد ترجى مودتها .. الا عداوة من عاداك عن حسدٍ "

هو الحسد ياكل نفوسهم المريضة

وارجع واقولك النجاح ,نجاحك انك تظل علي نفس المنهج علي منهج الشرف والاخلاق الكريمه ,تكون سعيد وواثق من نفسك .

وصدقني الي مع الله ابد الله ما يخذله ويكون له سند وعون بهالدنيا
بس تكون اختبارات وابتلائات تختبر قوة معدنك
ومحد يقدر يضرك او ينفعك الا بامر الله
وتذكر دائما كلام الله سبحانه , قال تعالى :((وَلا يَحِيقُ الْمَكْرُ السَّيِّئُ إِلا بِأَهْلِهِ فَهَلْ يَنْظُرُونَ إِلا سُنَّةَ الأَوَّلِينَ فَلَنْ تَجِدَ لِسُنَّةِ اللَّهِ تَبْدِيلا وَلَنْ تَجِدَ لِسُنَّةِ اللَّهِ تَحْوِيلا)).

ونهاية الكلام ثق بنفسك والله ولا تلتف للمحبطين والحسادوالله يوفقك .

No one can defeat us unless we first defeat ourselves

The.One يقول...

أهــا يعني هذي كانت بداياتـج مع النـك ;d


شي جميل lol


--


وأنـا مااوافقج بأول الكلام ..
انا وحده مااحب الانتقـام

مو لأنـي angle لأ..
بـس لأنـه مو من أهتماماتــي =)

مايهمني اني أنتقـم مومن اولوياتي.
في أشيـاء ماخذه اهتماماتـي وتفكيري غير الانتقـام .



--


وصـج فـي بنـات مالـهم حس
وفجأة ماشاءالله أبرزو وانحجو مثلج


شي وايـد حلـو
ونتمناه للكــل





مشكورة

Sweet Revenge يقول...

شكورة ذا ون انا اهنية ما اقصد الانتقام الحرفي ولا اهو شغل يالشاغل بس موقف صار معاي واذكر اني تضايقت من ردت فعل زميلاتي وحبيت ارد بطريقة عمليه عليهم واقولهم ان الناس مو باشكالها بس بافعالها بس ابد لا تظنين اني اكرهم او احقد عليهم ابدا بس
اهي مقولة مشهورة وانطبقت علي وضعي في ذيك الوقت
"Success Is The Best Revenge “
شاكرة اهتمامج ومرورج الطيب نورتينااا :)

reemas يقول...

انا قريت الموضوع و قريت التعليقات
موضوع جميل جدا و عجبني من ناحية الصياغه و من ناحية الموضوع

و انا اتفق معاج ان الانتقام متعه و لذه ايا كان نوعه
لكن نشوة الانتقام المضر تنتهي بسرعه و قد تنقلب الى شعور بالذنب و ينتهي الى حزن بدلا من السعاده
لكن نشوة انتقام النجاح او السويت رفنج مثل ما سميتيه فتدوم و حلاوة النجاح مستمره و تكون مصدر للسعاده
هناك انتقام اخر مفضل لدي
ان اكون قادر على ان اضر من عاداني ثم اصفح عنه و لا احاول ان اضره و لكن اجعله يعلم اني عفوت عنه عند المقدره
ليعرف اني احسن منه و اخلاقي افضل من اخلاقه
و اعلمه درس انه كما تدين تدان

تصدقين عاد انا الحين اجهز لانتقام نفس انتقامج
اعمل على الحصول على شهاده عليا لاسكت بها الكثيرين
تمنيلي النجاح في انتقامي

و شكرا علي دعوتج الكريمه لي لقراءة هذا البوست الرائع
مع تمناتي لكي بالنجاح الدائم و التوفيق

تحياتي

w z يقول...

السلام عليكم
كيف حالك اختي ، المعذرة موضوع قديم لكن مهم ف حبيت اشارك ")

الصراحة شفت موضوعك ب الصدفة قبل 7 شهور ، ف اعجبني جدا هدفك في تحقيق انتقام وهو ايضا بمثل هدفي رغم اختلاف القصص ، ف قلت ما ارد ع موضوعك حتى احقق ع الاقل اساس هدفي ")

القصة هي في ناس حولي من القرايب يحبون نفسهم كثير وعندهم قاعدة ان اللي ماعنده فلوس لايستحق النظر اليه او الاهتمام ، وان كان هذا الشخص المسكين المحترم حقق شيئ مميز او فريد عنهم ف انهم يحقدون عليه ويحاولوا يصغروا منجزه وكانه لا شئ ، ومنها القشة التي قصمت ظهر البعير والتي سببها القرايب ايضا ، ما اقدر اذكر محتوى السبب هنا ولكنه اظهر وجههم الحقيقي لي ، ومن هنا جاءت فكرة الانتقام وان افضلها هو النجاح ")

رغم عدم استمتاعي ب الدراسة ، الا انه بعد ذالك الحدث فرضت ع نفسي الجديه والاهتمام
والان بعد مرور السنوات من الدراسة والكد خلف الستار او بعيدا عن الانظار حصلت ع المفتاح اللي راح يوصلني الى النجاحات ولله الحمد ، لان هدفي يعتمد بشكل اساسي ع هذا المفتاح ")

انتي عطيتيني دافع بشكل غير مباشر بذا الموضوع ف شكرا لك ، واالله يوفقك في حياتك

Sweet Revenge يقول...

السلام عليك اخي العزيز ،قبل سنه قررت اغلق المدونه لان ماعدت ادخل لها وعالم المدونات اصبح شبه مهجور بس فكرة طرأت علي ان "لو شخص واحد يستفيد مما كتبت في المدونه راح اكون سعيده " اسعدتني جدا رسالتك. لو يعرف الاعداء عداوتهم وتحبيطهم لنا كيف يدفعنا للنجاح ماكانوا تكلموا او انتقدوا ابدا،النجاح محتاج مثابرة واصرار علي الوصول للهدف الكل يريد النجاح لكن لايصل الا القادر علي تقديم الوقت والجهد واهم عامل من وجه نظري الاستمرار بدون كلل او ملل .
خليني اقولك سر في الاول التحبيط حفزني بس بعد ماذقت طعم النجاح شجعني اني استمر خلي حبك لنفسك ولتحقيق احلامك وامالك هو المحفز "لاتفكر" باعداءك فكر بامجادك التي ستحققها والعوالم الي راح تحلق فيها ،حب ماتعمل وتخصص بما تهوي وخلي حدودك السما ،اوحيتلي ببوست جديد يمكن اكتبه قريب واكتب فيه عن مرحله مابعد الانتقام اللذيذ يممممم ،ارجوك اذا وصلت لك رسالتي عطني 👍

خلفية

Leelou Blogs