فيزيـــــــا

السلام عليكم شلونكم شخباركم يا جماعة ,مشتاقين والله :)

ايام الثانوية كنت احب الفيزيا ,ام قليب ادري ههههههههههههه

بس كانت هالمادة تبهرني ندرس قانون ونطبق في المختبر

كنت اشوف ان نظريات الفيزيا مو بس كلام ولكن لها تطبيق

واقعي وتقدر تشوفه بعينك الاقطاب المتنافرة تتجاذب

والاقطاب المتشابه تتنافر ,نطبق ونشوف بعيونا التنافر والتجاذب

الكهرباء الساكنه ,والكره الي لي حطينا ايدنا عليها شعرنا

ارتفع لي فوق ونقعد نضحك علي بعض.

الفيزيا قوانين للجمادات تعطينا الفرصة لمعرفتها وزياده تطويعها لفائدتنا

بس في قانون بعض الناس مصرين علي تطبيقه علي انفسهم

القانون الثالث لنيوتن
"لكل فعل رد فعل يساوية في القوة ويعاكسه في المقدار "

كل شي عندهم مرتبط بفعل ,بحدث ,لازم يكون مرتبط بشي

راحه البال لازم تكون بسبب

السعادة والفرح لازم تكون بسبب

ينتظرون فعل "تخرج ,زواج ,انجاب,وظيفة "علشان يفرحون "رد فعل"

دايما في حاله انتظار لشي ما..... علشان يبدون حياتهم ويتفاعلون فيها

لدرجة ان البعض مو عارفين شنو اهو بس منتظرين باستسلام لهالشي

الي راح يغير حياتهم 180 درجة ويجعلهم من السعداء

صعب يعني افرح لمجرد ان ابي افرح

غريب وايد احب لوحة مو فاهمه معناها


لا بالنسبه لي لا

احساسي بالسعادة راح يكون من الداخل

مو من ماديات لاتقدم ولاتاخر

مو من احداث ممكن تصير وممكن ماتصير

ما ادعو للبلاده ابدا بس اهي الاطمئنان والسلام مع النفس


موجوده الماديات موجوده الاحداث زين علي زين

مو موجوده

Don't Worry, Be Happy

نبي نعيش

بائس ما يملك شي يبي يعيش يبي يكون انسان من البشر

بائس يملك كل شي يبي يجور و يملك كل البشر

ان قلت غلط

قالك نبي نعيش

ان قلت حرام

قالوا ما عليه ,هو غفور رحيم واحنا نبي نعيش

يا جماعة افعالكم دمار و خراب

مو بيدينا احنا نبي نعيش

شلون تبي تعيش علي حساب غيرك

شلون تبي تعيش بدون ادني شعور من الذنب ومسئولية

شلون تقدر تعيش وانت عارف انك ظالم ومعتدي علي حقوق غيرك

انت ماتبي تعيش

انت تبي تنهب وتكبر علي حساب غيرك

تبي تعيش بدون تعب وبدون جهد

كلنا نبي نعيش بس بنظافه بأمان وراحه بال

نبي نعيش بامان منك ومن امثالك

نبي نعيش كرماء بدون تسول

بدون طمع إلا بالي جرت فيه مقاديرنا

تبي تعيش ونبي نعيش

بس تري انت الميت واحنا الي عايشين

Pearls

السلام عليكم ,شلونكم شخباركم ,مشتاقة والله (;

صج امر عليكم في مدوناتكم بس مشتاقة لاستضافتكم عندي ,حياكم الله .

في اوقات مثل هذا والازمة الاقتصادية تزيد وتستفحل يكون من الواجب المحافظة

علي السيولة قدر الامكان ,ووضع الاموال في ادوات تحفظ قيمتها لبعد الخروج من الازمة .

المعادن والاحجار الثمينه من هالصنف من الادوات الي تحافظ علي راس

مالك من الضياع والتأثر باسعار الفايدة والتضخم .

بس انا الاسبوع الي فات سويت العكس تماما ,تخليت رغم عن ارادتي عن لؤلؤة غالية

مستحيل عاقل يفرط فيها لان من الصعب الحصول علي مثلها وخاصة في وقت الازمات

بس مثل مايقولون للضرورة احكام .

ام طلال لؤلؤة غالية كان لازم اودعها لسفرها لاستكمال دراستها العليا في الخارج

شلون ماتكون لؤلؤة واهي الانسانه الخلوقة والهادية ,و المميزة في اي مجال تختاره

كان في انبهار بمؤهلاتها وتحصيلها المميز اهلّها بجدارة للحصول علي بعثة دراسية

هذا كان ختام السنة لام ''طلال بعثة ,سفر وحياه جديدة بس همن سنة بدات فيها كشخص

مختلف شخص يمكن مافكر بهالنهاية السعيدة ,بدات هالسنة بجروح والم ببدايه حزينه

لواقع قررت تغيره للافضل والاحسن .

لقت العون والسند من مجموعة ماشافت فيها الي انسان له الحق في الحياه بسعادة ,ساعدت بالي اقدر عليه وكنت من هالمجموعة .

والاهم انها ساعدت نفسها واتخذت قرارها ,في النهاية اهي لؤلؤة مهما علاها غبار تظل غالية وقوية مايهز الزمن قيمتها .

أأيد مجموعات الدعم ,اصدقاء ,اهل ,زملاء الي لهم المقدرة علي مساعدتك وقت الحاجة للعون والمسانده في الوقت الي تحس العالم كله ضدك ,الله كبير وموجود بكرمة وعطفة بس صاحب قريب يخفف عنك ويشد علي ايدك نعمة مالازم ننكرها ومنو منا مايمر بهالاوقات؟

بالمختصر اشوفهم في الاصدقاء بكل ماتحمل الكلمة من معني

بالنسبة لي اهم لآلئ في حياتي فخورة فيهم يزينون حياتي وايامي ماافرط فيهم ان شاء الله .

ام طلال اتمنالج التوفيق والنجاح يارب وانت دايما اغلي واحلي :)

اما لآلئ فاقولهم يارب لاتفرقنا ودوم خلينا "String of Pearls"

نشوفكم علي خير