الأحد، 25 يناير 2009

فيزيـــــــا






السلام عليكم شلونكم شخباركم يا جماعة ,مشتاقين والله :)

ايام الثانوية كنت احب الفيزيا ,ام قليب ادري ههههههههههههه

بس كانت هالمادة تبهرني ندرس قانون ونطبق في المختبر

كنت اشوف ان نظريات الفيزيا مو بس كلام ولكن لها تطبيق

واقعي وتقدر تشوفه بعينك الاقطاب المتنافرة تتجاذب

والاقطاب المتشابه تتنافر ,نطبق ونشوف بعيونا التنافر والتجاذب

الكهرباء الساكنه ,والكره الي لي حطينا ايدنا عليها شعرنا

ارتفع لي فوق ونقعد نضحك علي بعض.

الفيزيا قوانين للجمادات تعطينا الفرصة لمعرفتها وزياده تطويعها لفائدتنا

بس في قانون بعض الناس مصرين علي تطبيقه علي انفسهم

القانون الثالث لنيوتن
"لكل فعل رد فعل يساوية في القوة ويعاكسه في المقدار "

كل شي عندهم مرتبط بفعل ,بحدث ,لازم يكون مرتبط بشي

راحه البال لازم تكون بسبب

السعادة والفرح لازم تكون بسبب

ينتظرون فعل "تخرج ,زواج ,انجاب,وظيفة "علشان يفرحون "رد فعل"

دايما في حاله انتظار لشي ما..... علشان يبدون حياتهم ويتفاعلون فيها

لدرجة ان البعض مو عارفين شنو اهو بس منتظرين باستسلام لهالشي

الي راح يغير حياتهم 180 درجة ويجعلهم من السعداء

صعب يعني افرح لمجرد ان ابي افرح

غريب وايد احب لوحة مو فاهمه معناها


لا بالنسبه لي لا

احساسي بالسعادة راح يكون من الداخل

مو من ماديات لاتقدم ولاتاخر

مو من احداث ممكن تصير وممكن ماتصير

ما ادعو للبلاده ابدا بس اهي الاطمئنان والسلام مع النفس


موجوده الماديات موجوده الاحداث زين علي زين

مو موجوده

Don't Worry, Be Happy


هناك 41 تعليقًا:

أبو لطيف يقول...

وعليكم السلام ورحمة الله وبركاته

صحيح

الاحساس بالسعادة شعور داخلي

وهو الاصل ما عداه استثناء

انقلب حالنا وصار الاستثناء اصل

الله المستعان

جزاك الله خير

حفظك الله

Sweet Revenge يقول...

:)
واياك ,تسلم ياابو لطيف ,دايم اول في الخير وفي الرد
منوووووووووور عسا لايحرمنا من طلتك

esTeKaNa يقول...

الحاله هذي انا اسميها حاله السلام النفسي
!!
وهي حاله مريجة وجميله جدا
ان لا ترتبط سعادتك بشخص ولا حدث ولا شئ
قلبك هو قصرك وسعادتك وفيه كل كنوز فرحتك
من يريد ان يكون سعيدا يكون سعيدا متى ما اراد هو ذلك
ومن لا يريد
سيبقى ينتظر على رصيف العمر وقت طويل حتى يقترب منه شئ يسعده


بوست جميييل جدا
:)

7osen يقول...

كلام جميل

بس الاشياء اللي تحرك الإنسان من الداخل دائماً تكون رد فعل

يعني الإنسان بطبيعته الفطرية ملول اذا كانت حياته مافيها احداث مافيها اشياء جديدة يفتقد السعادة حتى لو كان قنوع ومتصالح مع نفسه

وطبعاً السعادة بمعناها الكبير

لكن يظل هالامر نسبي

انا برأيي ان السعادة تكمن بالإيمان متى ماكان الإنسان مؤمن بكل معنى الكلمة بالاقدار راح يكون سعيد ومتراضي مع نفسه وهذا اهو الاهم حسب رأيي


موضوع جميل

شلون تحبين الفيزيا ؟
ههههههه

احسها تبط الجبد

:)

أتيت متاخرة يقول...

مع أني أحب الكيميا وااااااايد و أحب التفاعلات الي فيها
وتعيسة جدا بالفيزيا

بس القانون الثالث لنيوتن عندي عليه تعقيب
فمو كل فعل يحتاج له ردة فعل ولا العكس مثل ما تفضلتي

بعض الافعال في مواقف معينة تجبر الشخص ان ما تكون هناك ردة افعال مساوية لها في القوة ومضادة لها في الاتجاه
أحسن ردة فعل هي
السكون

بعض الاحيان السكون هي ردة الفعل الطبيعية لمواقف كثيرة
فقط حتى لا يتأزم الوضع

Sweet Revenge يقول...

"قلبك هو قصرك وسعادتك وفيه كل كنوز فرحتك"


فعلا استكانه او كما قال الشيخ ابن تيمية جنتي في قلبي ,جد قلبي يعورني علي اصحاب الرصيف ,الله يهدي الجميع
نورك ولا نور الكهربا يا استكانه :)
بشري اي اخطاء املائية مني مناك صلحي علي راحتج .

Sweet Revenge يقول...

"السعادة تكمن بالإيمان متى ماكان الإنسان مؤمن بكل معنى الكلمة بالاقدار راح يكون سعيد ومتراضي مع نفسه وهذا اهو الاهم حسب رأيي"


وهذا الي ابي اوصله ,ما يمنع تاثرك بالاحداث بس ماتكون اهي كل شي وعلي اساسها يكون احساسك .
حصلت خذيت انت سعيد ما حصلت انت سعيد لا ,تكون سعيد بالحالتين وراضي لان سعادتك من قلبك وايمانك

تسلم ومتقصر زيارتك فرحتني :)

صبا يقول...

مساء الجمال والدلال

خوش درس :))

عزيزتي سويت ...اهم شي بالدنيا القناعه ...والله اذا وصلنا لمرحلة الرضا والقناعه بكل شي ..راح نعيش
بسلام وسعاده

كل ما رضيت بالواقع وبعالمي الخاص
اكيد راح اشعر بالسعاده الفعليه والحقيقيه.

اهم شي الأنا و الأنا

وتسلمين على هالبوست الي طافح طاقه ايجابيه

دمتي بحفظ الرحمن
:***

Sweet Revenge يقول...

يا هلا ويا غلا "اتيت متاخره" :)

معاج في الي تقولينه قوانين الفيزيا للجمادات
"الفيزيا قوانين للجمادات تعطينا الفرصة لمعرفتها وزياده تطويعها لفائدتنا "
بس بعض الناس الله يهديهم يطبقونه علي انفسهم بدون وعي .
اما السكون فمرات يكون ابلغ من اي تصرف او عمل

سامحينا علي القصور من زامن مو مارتج
في مدونتج ,زهبي الشاي والحلوي انا في الطريج :)

Sweet Revenge يقول...

صبا عندنا يا مرحبا يا مرحبا

"اذا وصلنا لمرحلة الرضا والقناعه بكل شي ..راح نعيش
بسلام وسعاده "

ايه يا صبا هذا الي نبيه والله مرات اسغرب ناس الله منعم عليهم بنعم مالها حصر ومع جذي تشوفينهم بكدر وحزن
لان القناعة مو موجودة للاسف

مشكووووره علي الزيارة الحلوه وماننحرم من تشجيعكم يارب :)

AK-47 يقول...

خوش بوست يعطيج العافية :)

Sweet Revenge يقول...

الله يعافيك ak-47

ماتقصر :)

أحمد الحيدر يقول...

موضوع جميل أخيتي أم قليب ;P

انا كنت من كارهي الفيزيا .. لي درجة تخرجت من الجامعة ساقط فيها مرتين وما عدتها لأني حولت وصارت مو مطلوبة :))

القانون الثالث لنيوتن " لكل فعل رد فعل يساويه في المقدار ويعاكسه في الاتجاه " ..

هذا القانون الوحيد اللي حليته صح برابعة ثانوي :)))

إلى الأمام دائما :)

Manal يقول...

مساء الخير

موضوع حلو فعلا

والسعادة بيد الانسان

باحساسه الداخلي وقناعته بما حولة

والحمد لله رب العالمين

:)

mellow يقول...

صبحج الله بالخير :)

موضوع السعادة حلو بس لو سمحتي مرة ثانية لا تدششين معاه فيزيا...عندي حساسية من هالمادة.

كنت حاطة في بالي أكتب بوست في هالموضوع ، و كتبت مسودات بس مو راضي يركب و أشوه إنج فتحتي الموضوع و تكلمتي فيه.

السعادة "مهارة" حالها حال أي مهارة ثانية (الطبخ ، الخياطة ، الرياضة) مع كثرة ممارستها نتقنها، أما إذا بننطر المناسبة علشان نستانس فما راح نكون سعداء ، حتى لو يت هالمناسبة السعيدة لأننا ببساطة لم نتدرب على السعادة.

تمنياتي لك و للجميع بسعادة دائمة :))))

Sweet Revenge يقول...

يا هلا والله احمد ,لو ادري جان عطيتكم ادروس فيها جان نجحت فيها وبامتياز بعد p:
تسلم احمد علي الزياره الحلوه ,شرفتنا

Sweet Revenge يقول...

الف حمد وشكر منوله
قالوها من قبل القناعة كنز بس من يسمع
منوره منور منوله :)

Sweet Revenge يقول...

هههههههه سلامتج من الحساسية mellow

كتبي لان كل واحد فينا يشوف الموضوع من جهه ,السعادة موضوع حلو احسن من السياسة الي اذبحونا فيها ربعنا المدونين

وصاجة اهي مهارة متي ما الواحد مارسها اتقنها
الفال حق العبوسين والمتشائمين يتدربون علي السعادة
شرايج نفتح نادي شراكه نعلم الناس الابتسامة والتفائل
بس خوفج مانحصل زباين الناس صايرة مدمنه كابة

-mate يقول...

اي والله صدقتي، قانون نيوتن الثالث ليس مجرد معادلة فيزيائية بل نستطيع تطبيقه في حياتنا العملية، لأنه بحد ذاته حكمة

والحكمة ضالة المؤمن، حتى لو وجدناها بكتب الفيزيا
;)

عاشت أم قليب
;q

فريج سعود يقول...

لازم تذكرينا بالبراشيم ؟

أتيت متاخرة يقول...

البت بيتج
حياج الله في كل وقت
الحين آنه فاضية عيالي خلصوا امتحانات
الحلوى والتمتاي لج
والقهوة لي ولج

Sweet Revenge يقول...

"الفيزيا قوانين للجمادات تعطينا الفرصة لمعرفتها وزياده تطويعها لفائدتنا "

ما احس قوانين الفيزيا تصلح للبشر ,احنا بشر مو جمادات ميت
انت كله معترض الله يهداك p:

Sweet Revenge يقول...

يا هلا ويا مرحبا فريج سعود

موتني من الضحك علي التعليق ,الله يسعد ايامكم
يا جماعه حلوه الفيزيا شفيها p;

منور فريج سعود

Sweet Revenge يقول...

اتيت متاخرة: يحيج ويبقيكي وبيت الله يوديج :)
يا رب الله يوفق عيالج للنجاح والفلاح في الدارين
وقهوتي طبعا معاج ولاتنسين الحلوه:)

قانونى كويتي يقول...

مساء الخير

يعطيج العافية على البوست

وبانتظار القادم

-mate يقول...

العزيزة سوويت

ومنو قال إن البشر مافيهم قوانين فيزياء داخل أجسامهم؟؟

-درجة الحرارة داخل الجسم شبه ثابتة، مجرد زيادة درجتين أو نقصان درجتين .. you die

وطرق التكيف مع هالمتغيرات كله عن طريق تمدد وانكماش بالظبط نفس الحديدة اللي تنكمش مع البرودة وتنقبض مع الحرارة!

- العين، ياطويلة العمر. راح تطبقين كل قوانين العدسات المقعرة والمحدبة والصورة الانعكاسية والمقلوبة فيها

-السيالات العصبية بالظبط مثل الكهرباء والأسلاك والوايرات

هذي بعض الأمثلة اللي احضرتني تقولج، إن فيزيا الأم لا تنفصل عن فيزيا البشر

وفي مادة اسمها
medical physics

متروسة من هالمعلومات، لا تخليني أبطل الكتاب وأغرف لج بعض القوانين وأحطهم عندج أوهقج
;q


الله يحفظج

Sweet Revenge يقول...

الله يعافيك قانوني كويتي
شرفتنا والله :)

Sweet Revenge يقول...

يا هلا ميت :اناما كنت اقصد
الناحية البيولوجية كنت اقصد ناحية المشاعر والاحاسيس ,شلون بتطبقة علي المشاعر هذي فيزيا .
وفي النهاية اهي وجهة نظر
طلعت بو قليب ,صام الكتب صم ;)

قانونى كويتي يقول...

مساء الخير

موضوع جميل وشيق ويرجعنا للذكريات

عاد مادة الفيزياء كانت السبب بدخولى للقسم الادبي

بس ماراح اقولكم ليش الحين

تحياتى لكم

Sweet Revenge يقول...

حياك الله قانوني , حلوه الفيزيا
غثيثه مرات بس حلوه .
بس همن صرت قانوني محترف بعد هذا مو شويه :)

غير معرف يقول...

http://www.liberal-kuwait.com/

mellow يقول...

أهلين سويت
راح أعر شوي عن الموضوع بس صاير توني أشوف ردج على موضوع الفلم..أشوه إن الفلم إعجبج وهو المفروض إنه ما يخرع بس آنا آنا يختج ويا هالقلب من صجي ما أقدر.

أستراليا يتراوالي شالوه من السينما بس إذا حصلته إن شاء الله أشوفه.

Sweet Revenge يقول...

هلا والله ميلوي ,اي اذا حصلتيه حلو مافيه عوار قلب وايد علي خفيف
والنهاية همن حلوه :)

Barrak يقول...

انا اقدر اقول انك منسجمه مع نفسك لابعد حد


بس ترى الفيزياء تجيب لي القامت

Sweet Revenge يقول...

هلا والله براك :)
الفيزيا تسوي فيك كل هذا ;)

مو دوم منسجمة مرات نتهاوش
الله لا يوريك لووووووول
مرة ومرة
منورنا براك

kuwaitawy يقول...

احلا ماده كنت احب ادرسها


واستانس اذا كان علي اختبار بهالماده


لاااا

وما ادرسها كلش بالايام العاديه عشان اذا يا قبل الاختبار بيوم او يومين احب ادرسها مدة طويله


هي



الكيمياء

Sweet Revenge يقول...

الله كل هالحب حق الكيميا
عاد تصدق ماكنت احبها بس كنت ادرس من الخوف علشان ما اسقط فيها
منورنا كويتاوي :)

قانونى كويتي يقول...

يعطيج العافية اخت سويت

ترى ماصارت :))

وين موضوعج القادم

:))

تحياتى

Sweet Revenge يقول...

قانوني يا ييكم بالطريج البوست
بس حبيت انزله مع اللوك اليديد
بس انت شرايك فيه ,حلو ؟

غير معرف يقول...

tramadol online buy tramadol cash on delivery - high dosage of tramadol

غير معرف يقول...

I'll right away seize your rss as I can't fіnd youг e-mаіl subsсriptіon hyperlіnκ oг е-neωsletter sеrviсe.
Do уou havе аny? Kіndly аllоω me recognisе in oгdeг thаt I may just subѕcribe.
Thanks.

my site ... Same Day Payday Loans

خلفية

Leelou Blogs