الثلاثاء، 6 يناير 2009

Pearls



السلام عليكم ,شلونكم شخباركم ,مشتاقة والله (;

صج امر عليكم في مدوناتكم بس مشتاقة لاستضافتكم عندي ,حياكم الله .


في اوقات مثل هذا والازمة الاقتصادية تزيد وتستفحل يكون من الواجب المحافظة

علي السيولة قدر الامكان ,ووضع الاموال في ادوات تحفظ قيمتها لبعد الخروج من الازمة .


المعادن والاحجار الثمينه من هالصنف من الادوات الي تحافظ علي راس

مالك من الضياع والتأثر باسعار الفايدة والتضخم .


بس انا الاسبوع الي فات سويت العكس تماما ,تخليت رغم عن ارادتي عن لؤلؤة غالية

مستحيل عاقل يفرط فيها لان من الصعب الحصول علي مثلها وخاصة في وقت الازمات

بس مثل مايقولون للضرورة احكام .


ام طلال لؤلؤة غالية كان لازم اودعها لسفرها لاستكمال دراستها العليا في الخارج

شلون ماتكون لؤلؤة واهي الانسانه الخلوقة والهادية ,و المميزة في اي مجال تختاره

كان في انبهار بمؤهلاتها وتحصيلها المميز اهلّها بجدارة للحصول علي بعثة دراسية

هذا كان ختام السنة لام ''طلال بعثة ,سفر وحياه جديدة بس همن سنة بدات فيها كشخص

مختلف شخص يمكن مافكر بهالنهاية السعيدة ,بدات هالسنة بجروح والم ببدايه حزينه
لواقع قررت تغيره للافضل والاحسن .


لقت العون والسند من مجموعة ماشافت فيها الي انسان له الحق في الحياه بسعادة ,ساعدت بالي اقدر عليه وكنت من هالمجموعة .
والاهم انها ساعدت نفسها واتخذت قرارها ,في النهاية اهي لؤلؤة مهما علاها غبار تظل غالية وقوية مايهز الزمن قيمتها .


أأيد مجموعات الدعم ,اصدقاء ,اهل ,زملاء الي لهم المقدرة علي مساعدتك وقت الحاجة للعون والمسانده في الوقت الي تحس العالم كله ضدك ,الله كبير وموجود بكرمة وعطفة بس صاحب قريب يخفف عنك ويشد علي ايدك نعمة مالازم ننكرها ومنو منا مايمر بهالاوقات؟


بالمختصر اشوفهم في الاصدقاء بكل ماتحمل الكلمة من معني

بالنسبة لي اهم لآلئ في حياتي فخورة فيهم يزينون حياتي وايامي ماافرط فيهم ان شاء الله .


ام طلال اتمنالج التوفيق والنجاح يارب وانت دايما اغلي واحلي :)

اما لآلئ فاقولهم يارب لاتفرقنا ودوم خلينا "String of Pearls"



نشوفكم علي خير






هناك 10 تعليقات:

-mate يقول...

اللؤلؤة اللي تخليتي عنها بتردلج (موزة) حاملة الشهادة وأجمل مما كانت عليه وتستاهل البعثة والله يوفقها إن شاء الله
:)

تعرفين ماهي الموزة؟
;q

Sweet Revenge يقول...

هههههههه ماشا ءالله الاول دائما ;)
الله يسلمك (عاد دكتورة مثلك)
ليش انت ماتقولنا شنو الموزة خو انت الاول ولا بتخليها stalemate.

-mate يقول...

هههههههههه

ليش أخليها stalemate شدعوة ياحافظ
;)

أفاا عليج،،

اسم موزة باللهجة الخليجية تعني الدرة الكبيرة، يعني اللؤلؤة الجامبو
;q

وهني لما تسمعين وحده اسمها موزه، هالإسم الكلاسيكي العتيق مو يروح تفكيرج لموزة الشواذي
:)

تحياتي لج ولزميلة المستقبل

Sweet Revenge يقول...

شدعوة موزة الشواذي ,تصدق احب هالاسم احسه اسمه تراثي ما يفهمه الا اهل الخليج .
منوووووورنا بمرورك :)

أحمد الحيدر يقول...

عسى الله يوفقها ويردها لكم بالسلامة انشالله بيدها الشهادة العودة ..

والفال لكم ولنا :)

Sweet Revenge يقول...

امين يا احمد والله يوفقك يارب :)

7osen يقول...

الله يوفقها إن شاءالله ويخليكم حق بعض

:)

Sweet Revenge يقول...

تسلم حسين يارب
ماتقصر ووالله :)

kuwaitawy يقول...

والله احنا اللي نخجل بتواصلج معانا ونشتاق لج ونشتاق لمواضيعج


عسى الله يرزقج بلآلئ كثيـــــرة


ويرجّع لؤلؤتج ام طلال بالسلامه والله يوفقها

Sweet Revenge يقول...

تســــــــــلم كويتاوي انا الي يخجلني تواصلكم ومساندتكم .
امين الله يسمع منك ,خبرك اللولو نادر نادر هالايام:)

خلفية

Leelou Blogs